Бу туһунан Ил Дархан Айсен Николаев «Быһа кэпсэтии» биэриигэ иһитиннэрдэ.
Айсен Николаев бэлиэтээбитинэн, Саха сирин киинэтин каассабай хомуйуута сыллата үрдээн иһэр. 2023 сылга сахалыы киинэ 100 мөл солк үбү-харчыны киллэрдэ, 2022 сылга — 73 мөл солк, 2021 сылга — 61 мөл солк.
«Бүгүҥҥү күҥҥэ бииргэ оҥоһуллар бырайыактар үлэлэрэ ыытыллар. Оннук чаҕылхай холобурунан «Алдан» киинэ буолар. Запорожскай уобалаһы кытта Россия аатырбыт артыыстара кыттыылаах киинэ уһуллуоҕа», – диэтэ Ил Дархан.
Бу регионнар икки ардыларынааҕы СВО туһунан бастакы уус-уран киинэ буолуоҕа. Хартыына режиссера Дмитрий Кольцов этэринэн, бастакы уһуллуулар Саха сиригэр номнуо буолан аастылар. Киинэ премьерата 2024 сыл балаҕан ыйыгар былааннанар.
Маннык бырайыактар регион аатын ааттаталлар диэн Айсен Николаев бэлиэтиир. 2023 сылга өрөспүүбүлүкэҕэ киинэ, анимация уонна сыыппара контена сайдыыта 2027 сылга диэри бигэргэтилиннэ.
Саха сиригэр 2020 сылтан ыла сыллата 80 мөл солк диэри үп-харчы киинэ эйгэтэ сайдыытыгар көрүллэр. Өрөспүүбүлүкэҕэ 50 киинэ оҥорор хампаанньа уонна айар кэллэктиип үлэлииллэр-хамсыыллар. Олор ортолоруттан 1992 сылга олохтоммут «Сахафильм» хампаанньа биир улахан хампаанньа быһыытынан биллэр. Сыл иһигэр өрөспүүбүлүкэҕэ 12 киинэ тахсар. 2011 сылтан уопсайа 100 киинэ таҕыста. Сахалыы киинэ үбү-харчыны киллэрэрэ сыллата үрдээн иһэр.