Саха сирин бырабыыталыстыбата уу суола түмүктэнэр уонна кыһыҥҥы тырааныспар схематыгар көһөр кэмҥэ уматыгы тохтоло суох тиэйиини хааччыйар туһугар эбии дьаһаллары ылар.
Көрүллэр быһаарыылартан — мууһу солуур флоту туһанан өрүһүнэн туораатыы үлэтин уһатыы уонна кыһыҥҥы суолу эрдэ арыйыы буолар. Бу туһунан СӨ гражданскай гражданскай көмүскэлин уонна нэһилиэнньэ олоҕор-дьаһаҕар куттал суох буолуутун хааччыйыы миниистирин солбуйааччы Никита Павлов иһитиннэрдэ.
«Өрөспүүбүлүкэ Бырабыыталыстыбата уонна федеральнай структуралар уматыгынан хааччыйыы боппуруоһун ураты хонтуруолга туталлар. Хоту уматыгы таһыы быйылгы сыллааҕы былаана 18 126 туоннаҕа тэҥнэһэр. Бүгүҥҥү күҥҥэ бу кээмэй 72 бырыһыана дуогабарданан турар», — диэн Никита Павлов эттэ.
Билигин уу суола сабыллыан иннинэ ньиэп бородууксуйатын кэмигэр тиэрдиигэ ураты болҕомто ууруллар. Өрөспүүбүлүкэ федеральнай киинтэн балаҕан ыйыгар анаммыт уматыгы сүөкээһини түргэтэтэргэ көрдөһөн, хаалбыт кэми толору туһанар баҕалаах.
«Билигин сүрүн сорук — уматыгы уу суола сабыллыан иннинэ тиэрдии. Биһиги федеральнай киинтэн балаҕан ыйынааҕы ньиэп бородууктатын сүөкээһини түргэтэтэргэ көрдөстүбүт. Бу таһаҕаһы тиэйиини ситиһиилээхтик түмүктүүргэ булгуччу суолталаах», — диэн миниистири солбуйааччы тоһоҕолоон бэлиэтээтэ.
Маны тэҥэ, бырабыыталыстыба сезоннар икки ардыларынааҕы кэмҥэ эрдэттэн сэрэтэр дьаһаллары ырытар. Мууһу солуур флоту туһанан паромнар үлэлэрин уһатыы уонна Аллараа Бэстээх ыстаансыйатыттан уматыгы суһаллык тиэйэр туһугар төһө кыалларынан кыһыҥҥы суолу эрдэ арыйар былааннанар.
Дьокуускай куоракка массыынаны саппыраапкалыыр ыстаансыйаларга (АЗС) ньиэп бородууксуйатын атыылааһын салҕанар. «Саханефтегазсбыт» АУо биэс АЗС-гар бэнсиин АИ-92, АИ-95 уонна дизельнэй уматыгы уу харчыга, каартанан атыылыыллар. Бэнсииҥҥэ биир тырааныспарка 20 лиитэрэҕэ диэри хааччахтааһын турар. Ол Михаил Николаев проспегар, Жатайга уонна Маҕаҥҥа суол быһа охсуһууларыгар, Сэбиэскэй Аармыйа 50 сыла уулуссаҕа уонна Хатыҥ Үрэх шоссетыгар баар сапыраапкаларга.
«Туймаада-Нефть» АУо сапыраапкаларыгар АИ-95 бэнсиин мобильнай сыһыарыынан атыыланар. АИ-92 бэнсиини уу харчынан уонна каартанан 20 лиитэрэҕэ диэри хааччахтаах түөрт АЗС-ка атыылыыллар. Дизельнэй уматыгы хааччаҕа суох биэрэллэр.
«СибОйл» ХЭУо сапыраапкаларыгар АИ-92 уонна АИ-95 бэнсиин хааччаҕа суох харчынан да, каартанан даҕаны атыыланар. Покровскай тракт 5-с килэмиэтиригэр баар «Сервис Ойл» ХЭУо сапыраапкатыгар АИ-92 баар, биир массыынаҕа 20 лиитэрэҕэ диэри хааччахтаах.
«Киин куорат сапыраапкаларыгар нэһилиэнньэҕэ атыы туһунан этэр буоллахха, быһыыны-майгыны куруук хонтуруолга тутабыт. Сорох АЗС-га биир тырааныспарга 20 лиитэрэҕэ диэри хааччахтааһын оннунан хаалар, оттон «СибОйл» хампаанньа АЗС-гар АИ-92 уонна АИ-95 бэнсиин харчынан, каартанан хааччаҕа суох атыыланар», — диэн Никита Павлов бэлиэтээтэ.
Тыа хаһаайыстыбатын табаары оҥорон таһаарааччыларыгар ураты болҕомто ууруллар. Дизельнэй уматык ырыынагар быһыы-майгы тупсубутунан сибээстээн, тыа хаһайыстыбатынан дьарыктанааччылары хааччыйыы АЗС ситиминэн толору кээмэйинэн барар.
Өрөспүүбүлүкэ Бырабыыталыстыбата уонна анал салаалар уматыгынан хааччыйыыны салгыы хонтуруолга туталлар уонна тырааныспар схемата уларыйар кэмигэр нэһилиэнньэҕэ ньиэп бородууксуйатын кэмигэр тиэрдиигэ наадалаах миэрэлэри ылаллар. Бу туһунан Ил Дархан уонна Бырабыыталыстыба пресс-сулууспата суруйар.