Саха сиригэр быыбар кэмигэр биэс дойду уопсастыбаннай кэтээн көрөөччүтэ үлэлии сылдьар.
Куоластааһын бүтэһик күнүгэр СӨ Уопсастыбаннай кэтээн көрөр киинигэр сылдьан, киин үлэтин-хамнаһын кытта билистилэр, онлайн-трансляцияны көрдүлэр.
Бүгүҥҥү күҥҥэ өрөспүүбүлүкэ үрдүнэн 274 быыбардыыр учаастак онлайн-трансляциянан үлэлии олороллор. Куоластааһын туох да кэһиитэ суох барарын кэтээн көрөөччүлэр хааччыйаллар. Ону таһынан социальнай ситимнэри уонна интернет-эйгэни хонтуруоллууллар.
Тас дойдуттан сылдьар уопсастыбаннай кэтээн көрөөччүлэр Киин уонна өрөспүүбүлүкэ кэтээн көрөөччүлэрин үлэлэрин үрдүктүк сыаналаатылар. Ону таһынан үс күннээх быыбар нэһилиэнньэҕэ быдан табыгастааҕын бэлиэтээтилэр.
«Эһиги быыбары ыытар информационнай технологияҕыт наһаа күүскэ сайдыбыт эбит: видеонан кэтээн көрүү куоластааһыны буола турар бириэмэнэн хонтуруоллуур кыаҕы биэрэр, өссө Уопсастыбаннай балаата иһинэн бүтүн анал киин баар. Мин санаабар, Мали Арассыыйа курдук үрдүк таһымнаахтык быыбары ыытыыга дьулуһуохтаах. Биһиги үс күн устата быыбардыыр учаастактары кэрийдибит, ол тухары ханнык да кэһиини көрбөтүбүт,» — диэтэ Малиттан сылдьар Пангале Сайе.
Казахстантан Алибек Тажибаев Арассыыйаҕа быыбар тэрээһиннээхтик уонна чуолкайдык ыытылларын бэлиэтээтэ:
«Биһиги сылдьыбыт улуустарбытыгар, ону тэҥэ Дьокуускай куорат быыбардыыр учаастактарыгар барытыгар бырааһынньык курдук. Бу Арассыыйа куоластааһыҥҥа систиэмэлээх быһаарыылары ылынарын көрдөрөр. Казахстаҥҥа биһиги эһиги дойдугутугар ыытыллар бэлитиичэскэй, электоральнай бырассыастары болҕомтолоохтук кэтээн көрөбүт, тоҕо диэтэххэ Арассыыйа биһиги сүрүн экэнэмиичэскэй партнердарбытыттан уонна бырааттыы норуоттарбытыттан биирдэстэрэ буолар. Олус үчүгэй санаа хаалла, үрдүк таһымнаах тэрээһини көрдүбүт.»
Бүгүн тас дойдуттан сылдьар уопсастыбаннай кэтээн көрөөччүлэр хас да быыбардыыр учаастакка сылдьыахтара, итиэннэ куолаһы бүтэһиктээх ааҕыыга кыттыахтара.
Екатерина Гладкина.