Быйыл өрөспүүбүлүкэ 18 улууһугар уонна “Дьокуускай” куораттааҕы уокурукка сүүмэрдээһини ааспыт 56 соҕотуопкалыыр тэрилтэ хаһаайыстыбалартан үүт туталлар. Соҕотуопсуктар алтынньы ыйы 54 689,33 туонна үүттээх, ол эбэтэр сыллааҕы былааннаммыт кээмэйтэн 97,2 бырыһыанын толорон түмүктээтилэр. Бу көрдөрүү былырыыҥҥы туһааннаах кэм киэниттэн 8,33 туонна чорбохтоох.
Муниципальнай тэриллиилэртэн отчуоттанар кэмҥэ Нам улууһа 131,5, Кэбээйи 121,2, Мииринэй 109,2, Өлүөхүмэ 107,9, Куорунай 104,8 бырыһыанныыга тириэрдэннэр, аһара туттулар. Мэҥэ Хаҥалас 98,5, Таатта 98, Ленскэй 97,7, Бүлүү 97,6, Хаҥалас 96,4, Үөһээ Бүлүү 96, Дьокуускай 95,2, Ньурба 94,6 бырыһыаннарын ситиһэннэр, инники кэккэҕэ сылдьаллар. Дьааҥы (75,5%), Уус Алдан (83,6%), Чурапчы (84,87%), Томпо (87,6%) уонна Амма (90,2%) улуустара хаалан иһэллэр.
Билиҥҥи туругунан, быйыл үүтү оҥорон таһаарыыны уонна соҕотуопка үлэтин хааччыйыыга көрүллүбүт үптэн улуустарга уонна куораттааҕы уокуруктарга 99 бырыһыана, ол эбэтэр 3,729 млрд солкуобай тиксэрилиннэ. Санаттахха, ааспыт сылга 62 288,9 туонна үүт соҕотуопкаланара былааннаммытыгар сыл түмүгүнэн 63 356,68 туонна үүт тутуллубута. Ил Дархан Айсиэн Николаев “үүтү тутуу кээмэйэ сыл ахсын улаатан иһиэхтээх” диэн соругу туруорар итиэннэ туттарыллыбыт үүт толору кээмэйинэн толуйуллуохтааҕын модьуйар.
Тыа хаһаайыстыбатын уонна ас-үөл бэлиитикэтин министиэристибэтэ 2026 сыл түмүгүнэн 63 406 туонна үүт тутуллуохтаах диэн былаанныыр. Үөскээбит быһыы-майгы эбии тутуллар 6 879 туонна үүккэ бүддьүөттэн 389,689 мөл. солкуобай көрүллэрин эрэйэр. Ити үп кэллэҕинэ, лимиити таһынан туппут соҕотуопсуктар хаһаайыстыбалары кытта аахсалларыгар туһуланыа. Министиэристибэҕэ боппуруос кэмигэр уонна сөптөөхтүк быһаарылларыгар эрэнэллэр.
Василий Никифоров
Сообщение Үүт соҕотуопкатыгар көрүллүбүт үптэн 99 бырыһыана улуустарга тиксэрилиннэ появились сначала на Новости Якутии и Якутска — свежие новости онлайн на сайте ulus.media — Улус Медиа.