Сахалартан биир бастакынан киинэ обзорун устан саҕалаабыт, билигин киэҥ эйгэҕэ ситиһиилээх режиссер быһыытынан биллэр Николай Корякин-Айдын Ате “Директор” киинэтэ сүрэхтэнэрэ аҕыйах хонук хаалла. Саҥа киинэ – режиссер толору комедия жанрыгар бастакы холонуута. Бүгүн Николай Корякин – “Улус.Медиа” ыалдьыта.
Видеоблогтан – киинэ устуутугар
Николай Корякин аан бастаан биллэр киинэлэргэ обзордары устан дьон биһирэбилин ылбыта. Ол кэннэ кыралаан саха киинэтин эйгэтигэр таһаарыылаахтык үлэлии-хамныы сылдьар дьону кытта подкаст форматтаах сэһэргэһиилэри устар буолбута. Дьэ, онтон, ситэн-хотон, режиссер быһыытынан маҥнайгы холонуутун, “Убаһа этэ” кылгас киинэни устубут.
“Киинэҕэ интэриэстээҕим кыра эрдэхпиттэн биллэр этэ. Оскуолаҕа да сылдьан, устудьуоннуур да сылларбар бу эйгэҕэ күүскэ тардыһарым. Урут убайым “Властелин колец” киинэни ылан доҕотторунаан бэйэлэрэ клип оҥорбуттарын сэҥээрэ көрбүппүн өйдүүбүн. Ону кытта төрөөбүт дойдубар, Маҕараска, уолаттар киинэ устан холоноллорун ымсыыра көрөөччүм. Ол баҕам бэйэтин биллэрэн, билигин режиссер буолан олордоҕум”, – диэн кэпсиир Николай.
Бастакы киинэ барытыгар бастыҥ
Кылгас киинэлэрин кэнниттэн Николай Корякин “Тимир” диэн комедия аҥардаах драманы таһаарбыта. Бу киинэ тахсаат да дьон кутун-сүрүн туппута, киэҥ эйгэҕэ сөбүлэппитэ: ону бигэргэтэн, өрөспүүбүлүкэ таһыгар кириитиктэр хайҕалларын ылан үс төгүл наҕараадаламмыта.
Ол курдук “Бастыҥ режиссер үлэтэ” номинацияҕа “Зимний” (Москва к.) диэн авторскай киинэ фестивалыгар уонна Чебоксарыга, Забайкальеҕа норуоттар икки ардыларынааҕы фестивалларга кыайбыта. Маны таһынан, Чита куоракка ыытыллыбыт куонкуруска “Дьон биһирэбилэ” бирииһи ылбыта.
“Хас биирдии киинэм бэйэбэр туспа дириҥ суолталаах. Ол эрэн “Убаһа этэ”, бастакы проегым буолан эбитэ дуу, дууһабар ордук чугас сытар. Дьон бу киинэ икки чааһын иккиэннэрин сэргээн көрбүттэрэ, онон үһүс чааһын толору метрдаах киинэ оҥорон таһаараары бэлэмнии сылдьабыт – эһиил сэтинньигэ күүтүҥ”, – диэн үллэһиннэ режиссер.
Инникитин Николай Корякин триллер уонна детектив жанрдарыгар холонон көрүөн баҕарын туһунан билинэр. Ол эрэн хас биирдии айар куттаах киһи иэйиигэ наадыйар. Иэйии да араастык кэлэр: кимиэхэ эрэ соһуччу, кимиэхэ эрэ өр күүттэрэн баран.
Режиссер этэринэн, кини иэйиитэ интэриэһинэй дьону кытта кэпсэттэҕинэ, ол-бу саҥаны көрдөҕүнэ-иһиттэҕинэ уһуктар: “Холобур, хайа эмэ киинэни көрө олорон тугу эмэ бэйэбэр бэлиэтиибин, сонун материал булабын уонна Саха сирин майгытыгар-сигилитигэр, менталитетыгар барсар дии санаатахпына, устуохпун сөп эбит диэн хараҕым умайар”.
“Директор” – киһи сынньанар, дуоһуйа күлэр киинэтэ
Хаһан баҕарар режиссердар көрөөччүнү күллэрэрдээҕэр ытатар, долгутар судургу дииллэр. Николай Корякин саҥа киинэтэ псевдодокументальнай жанрга киирсэр, ол аата бу киинэ дьиҥнээх олоххо чугаһатан уһуллубут.
“Иннинээҕи үлэлэрим толору комедия буолбакка, криминальнай комедия уонна драмеди жанрдарыгар уһуллубуттара. “Директор” уратыта диэн кини бүтүннүү комедия, ол иһин биһиги төһө кыалларынан элбэх күлүүлээх түгэни киллэрэ сатаатыбыт. Биир тылынан эттэххэ, бу киинэни көрөн киһи астына-дуоһуйа күлүөхтээх, сынньаныахтаах. Санаабыт сатанна ини диэн эрэнэбит”, – диир Николай.
“Директор” киинэҕэ сүрүн оруолу толорбут артыыс Дмитрий Баишев Николайга эрдэ подкастка уһуллан турардаах. Онно кинилэр кэпсэтии быыһыгар “сахалыы комедия устуохха баар эбит” диэн дьээбэ курдук санаа бырахсыбыттар: “Онтуобут аҕыйах ыйынан дьиҥнээхтии туолан тэҥҥэ киинэ уста сылдьар буолуохпут диэн санаан да көрбөтөхпүт буоллаҕа”.
Лаврентий оруолун Дмитрий Баишев олус үчүгэйдик табан оонньообут. Николай кинини хара маҥнайгыттан бу оруолга көрбүт. Киинэҕэ Дмитрийы тэҥэ кини төрөппүт ийэтэ оонньообута биир интэриэһинэй чахчы буолар. Режиссер артыыһын кытта киинэ былаһааккатыгар бэркэ тапсан, бэйэ-бэйэлэрин ситэрсэн үлэлээбиттэр.
“Оннооҕор биир сыананы олох сэһэргэспэккэ, аҥардас хамсаныынан, харахпытынан эрэ кэпсэтэн диэбиккэ дылы, устан турардаахпыт. Уопсайынан да киинэ барыта тып-тап курдук уһуллубута, табыллыбыта”, – диэн бэлиэтиир Николай.
Саха киинэтигэр саҥа сүүрээн
Саха киинэтин сэҥээрэр, туох эмэ саҥаны, сонуну көрүөн баҕарар дьон “Директор” киинэни сөбүлүөхтэрэ диир Николай Корякин.
“Күннээҕи түбүктэн сынньана, аралдьыйа таарыйа кинотеатрдарга кэлэҥҥит биһиги киинэбитин көрүҥ диэн хамаандам аатыттан ыҥырабын. Сүрүн оруолу толорооччу Дмитрий Баишев көрөөччү биһирэбилин номнуо ылбыт, дьон таптыыр артыыһа, онон кини геройа чаҕылхай, сонун буолан таҕыста. Киинэбит кэлин ханнык да атын платформаҕа тахсыбат, ол иһин хайаан да улахан экраҥҥа көрүҥ, сэргээҥ”, — диэн түмүктээтэ режиссер.
Санатар эбит буоллахха, “Директор” киинэ Саха сирин бары кинотеатрдарыгар алтынньы 29 күнүгэр сүрэхтэнэр.
Сообщение “Директор” саҥа сахалыы киинэ: режиссер Николай Корякинныын кэпсэтии появились сначала на Новости Якутии и Якутска — свежие новости онлайн на сайте ulus.media — Улус Медиа.