Чем снег тяжелей у крыльца
И чем безнадежней ненастье —
Тем трепетней песни певца,
Тем больше тепла в них и страсти.
Расул Гамзатов.
Уһулуччулаах Поэт, дойдунаат санааны иитиигэ, дойдуга, Ийэҕэ, доҕотторго анаммыт үгүс хоһооннордоох Расул Гамзатов алтынньы 22 күнүн дойдуларын иннигэр ытык иэстэрин толорон олохторун дьоллоох, эйэлээх олох иһин толук биэрбит чулуу ыччаттарбыт ааттарын үйэтитэр сыаллаах «Үрүҥ Туруйалар» диэн кэриэстэбил күнүнэн билинэри ситиспитэ. Бу күн араас сылларга кыргыс толоонугар охтубут буойуттары кэриэстээн иһийэн, нөрүйэн туруох тустаахпыт, кинилэр олохторун суолун эргиллэн көрөн, хорсун санааларыгар сүгүрүйэн, оҥорботохторун оҥорор, ситэрбэтэхтэрин ситэрэр санааны кэнэҕэски ыччакка иитиэхтээхпит.
Хоһооҥҥо этиллэрин курдук, дойдуларын буорун булбатах уолаттарбыт уонна сырдык тыыннара хабараан хапсыһыыга быстыбыт дуолан дьоммут ыраас дууһалара туруйа буолан, эбэтэр сырдык сулус буолан дойдуларын эргийэ көтөн одуулуур эбит буоллахтарына, кинилэр эмиэ хас биирдиибит курдук уйадыйан туран: «Миигин умнубатахтар эбит!» — диэн өрө тыынан эрдэхтэрэ…
Кэриэстэбил күнүн үрдүк күүрүүлээхтик Нам улууһугар улуус баһылыга Юрий Слепцов өйөбүлүнэн үһүс төгүлүн тэрийдилэр. Ол курдук бу күн 290-тан тахса оҕо хоһоон ааҕыытыгар, уруһуйга, эссе суруйан күрэхтэстилэр. Оҕолор уруһуйдара диэтэххэ, олус дириҥ ис хоһоонноох буолан, бэл бу уруһуйдар тиллэн, тыыллан-хабыллан кэлиэх курдуктар — ол курдук киһи бөтө бэрдэрэр көстүүлэрин оҕолор барахсаттар дьүһүйбүттэр. Бары да сүрэх баастаах буоламмыт бу курдук күүстээх айымньылар үөскүүллэр.
Тэрээһиҥҥэ кыттыбыт оҕолор кэрэҕэ уһуйуллан үтүө-мааны, аһыныгас, эйэҕэс дьон буолуохтара, киртэн-хахтан тэйэн сырдыкка, үтүөҕэ дьулуурдаах дьон буолуохтара диэн бигэ эрэллээхпин.
Ыччат дьон өлүү-сүтүү төрүөтүн өйдөөн, олоҕу, сырдыгы харыстыыр, өрө тутар дьон буолуохтарын баҕарыллар.
Бу тэрээһин чэрчитинэн ыытыллыбыт уруоктарга кыттан, дойдунаат санаа анал таҥас кэтэн хаамыынан-сиимиинэн, саа-саадах эрэ тутан дойдуну көмүскүүрүнэн эрэ муҥурдаммат диэн, дойдунаат санаа оҕоҕо тэлгэһэтиттэн, ыаллыы олорор дьонугар-сэргэтигэр эйэҕэс сыһыантан, чугас дьоҥҥор иһирэх тапталтан, туора киһи кыһалҕатын сөпкө өйдүүртэн, ылынартан, кыһалҕалаахха көмөлөһөргө бэлэм буолууттан, кыра эрдэхтэн эйэ дэмнээх сыһыаны тэнитэртэн саҕаланар диэн өйдөтөр-сырдатар үлэ ыытылынна.
Ону тэҥэ кэриэстэбил күнэ алтынньы 22 күнүгэр Бүлүү оройуонун библиотекатын көҕүлээһининэн Бүлүү куоракка ыытылынна. Бу тэрээһин тула эдэр-эмэн дьон тоҕуоруһан, олус уйан литературнай-музыкальнай туруоруу көрдөрүлүннэ. Онтон дыбарыас түһүлгэтигэр дойдуларыгар эргийбэтэх хаарыаннаахай уолаттарбыт субу ортобутугар баар курдук сэмэйдик иһийбит мэтириэттэриттэн көрөн турдулар. Кинилэр олорон ааспыт олохторун, кутаа уоттаах сүрэхтэрин арай мөссүөннэрин иннигэр умайбыт чүмэчи симик уота туоһулуур…
Бу кыргыс хонуутугар охтубут уолаттары кэриэстиир, саныыр анал күнү умнумуоҕуҥ — атын өрөгөй күннэригэр ардыгар өлбүттэри умнабыт эбээт! Сатаатар биир күн ис сүрэхтэн кинилэр чугас дьонноругар кутурҕан биллэрэн, иһийэн, нөрүйэн ыар сүтүктэрбитин билинэн, кинилэр ааттарын ааттаан олорботох олохторун уһатыаҕыҥ, үйэтитиэҕиҥ.
Антонина Ускеева, алтынньы 22-23 күннэрэ, Бүлүү-Нам.
Сообщение Кыргыс толоонугар охтубут буойуттары кэриэстээтилэр появились сначала на Новости Якутии и Якутска — свежие новости онлайн на сайте ulus.media — Улус Медиа.