Инновация менеджменин үрдүкү оскуолатыгар (ВШИМ) бүгүн өрөспүүбүлүкэтээҕи олох-дьаһах уонна энэргиэтикэ хаһаайыстыбаларын тэрилтэлэригэр аналлаах сэминээр үлэтэ саҕаланна. Бу туһунан «Саха Сирэ» суруйар.
Сэминээр тиэмэтэ: «Уһук Илин эрэгийиэнигэр тарыыбы сүрүннээһин: соруктар, быһаарыылар уонна сыыппараҕа көһүү». Тэрээһин Саха Өрөспүүбүлүкэтин сыананы олохтооһун уорганнара тэриллибиттэрэ 60 сылыгар ананна.
Аһаҕас кэпсэтии көрүҥүнэн сэминээр кыттааччылара өрөспүүбүлүкэҕэ тарыып бэлиитикэтин сайыннарыыга уонна инфраструктураны тупсарыыга туһуламмыт көдьүүстээх боппуруостары ырытан баран, тустаах соругу туруоруохтара, сонун сүүрээннэри тобулар быһаарыылары ылыныахтара. Биллэн турар, сэминээр сыаналаах дьыалабыай сибээстэри олохтуурга уонна идэ таһымын үрдэтэргэ саҥа кыахтары, сонун саҕахтары арыйыаҕа.
Күн бастакы аҥаарыгар суолталаах пленарнай сүбэ мунньахха РФ антимонопольнай сулууспатын (ФАС) Олох-дьаһах хомунаалынай хаһаайыстыбатын сүрүннүүр управлениетын салайааччыта Сурен Оганесян, экэниэмикэ уонна научнай чинчийэр университет инфраструктурнай салааларын сүрүннүүр үрдүкү оскуола институтун дириэктэрэ Илья Долматов, СӨ Олох-дьаһах хомунаалынай хаһаайыстыбатын уонна энэргиэтикэтин миниистирэ Вячеслав Емельянов кыттыыны ыллылар.
Эбиэт кэнниттэн «Хомунаалынай комплекс: тарыыптар, инвестициялар, хонтуруоллуур-кэтиир үлэ уонна сыыппараҕа көһүү» диэн төгүрүк остуолга сэминээр кыттыылаахтара сыананы быһыыга (ценообразование) билиҥҥи уларыйыылары (итии уу, уу, ууну ыытыы), сүрүннүүр сөбүлэһиилэри, хомунаалынай инфраструктураны саҥардыыны, хомунаалынай эйгэҕэ инвестициялары тардыыга билиҥҥи турук уонна кыах, инфраструктурнай салаалары сүрүннээһини ырытыһыахтара. Маны таһынан, итиинэн-сылааһынан, уунан хааччыйыыга уонна ууну туһаныы тарыыптарыгар сүрүн үптэн (основные средства) уонна материальнайа суох актыыптан (нематериальные активы) туттуу ороскуотун ааҕыыга амортизация саҥа ньымаларын туһунан боппуруостары көрүөхтэрэ.
Хаартыскаларга Елена Потоцкая түһэриилэрэ
Сообщение Олох-дьаһах уонна энэргиэтикэ хаһаайыстыбатын тэрилтэлэригэр тарыыбы сүрүннээһин сэминээрэ саҕаланна появились сначала на Улус Медиа.