Бүгүн, бэс ыйын 3 күнүгэр, Саха Республикатын правительствотын 1 №-дээх дьиэтин улахан саалатыгар чахчы да үөрүүлээх түгэн буолла. Бу туһунан «Илкэн» портал суруйар.
Бу күн, Аҕа дойду Улуу сэриитин кыттыылааҕа, А.Е. Кулаковскай аатынан Саха сирин государтсвеннай бириэмийэтин лауреата, Саха АССР норуотун хаһаайыстыбатын үтүөлээх үлэһитэ, Саха Республикатын, Дьокуускай уонна Бүлүү куораттарын бочуоттаах олохтооҕо Кирилл Егорович Павлов 100 сааһын үөрүүлээхтик бэлиэтээһин буолла.
Кирилл Егорович оруобуна сүүс сыллааҕыта бэс ыйын 3 күнүгэр Бүлүү оройуонун Чочу нэһилиэгэр төрөөбүтэ. 1944 сыллаахха Кыһыл аармыйа кэккэтигэр ыҥырыллан, Японияны кытта сэриигэ кыттыбыта. Сэрии кэнниттэн эйэлээх олоҕу тутууга салайар салааҕа үлэлээбитэ, Саха АССР Үрдүкү Сэбиэтин депутатынан үс төгүл талыллыбыта.
Ытык киһибит Кирилл Егорович төрөөбүт күнүн – 100 сааһын сүһүөҕүн үрдүгэр көрсөн, үөрүүтүн бар дьонун кытта бииргэ үллэһиннэ. Кини – биэс оҕо аҕата, уон сиэн эһээтэ, сүүрбэ сиэн хос эһээтэ.
Үөрүүлээх түгэннэ Россия Президенэ Владимир Путин, Саха Республикатын Ил Дархана Айсен Николаев эҕэрдэлэрэ ааҕыллан иһитинэрилиннэ уонна бу түмсүү суолтатын өссө үрдэтэн биэрдэ.
Кэрэ бэлиэ күн долгутуулаах түгэнинэн – Кирилл Егорович Павловка Саха сирин уһун үйэлээхтэрин «Үйэ саас» диэн анал бэлиэлэрин туттарыы буолла. Бэлиэни Саха Республикатын Государственнай Мунньаҕын (Ил Түмэн) председателэ Алексей Еремеев туттарда.
«Бүгүн биһиги республикабытыгар чахчы да уһулуччулаах күн. Кирилл Егорович Павлов Саха сиригэр сүүс саастарын туолбут 22-с киһинэн буолла. Эн олоххо бэйэҥ сыһыаҥҥынан биһиэхэ үтүө холобур буолаҕыҥ. Биһигини үрдүккэ, кыайыыга күөттүүгүн», — диэтэ, Саха Республикатын Правительствотын председателин солбуйааччы Георгий Степанов.
Кирилл Егорович Павлов – биһиги сүдү киһибит, Саха сирэ барыта ытыктыыр киһитэ, — диэн сыаналаата, бэйэтин эҕэрдэ тылыгар Дьокуускай куорат дьаһалтатын баһылыга Евгений Григорьев.
Ити курдук, лоп курдук бүгүн 100 сааһын томточчу туолбут Кирилл Егорович Павловы – Дьокуускай куорат депуттарын Думатын председателин 1-кы солбуйааччы Евдокия Евсикова, Бүлүү улууһун баһылыга Сергей Винокуров, Дьокуускай куорат депуттарын Думатын председателэ Альберт Семенов, Саха Республикатын бэтэрээннэрин сэбиэтин салайааччы Аркадий Саввинов, Ытык сүбэ председателэ Люлия Григорьева эҕэрдэлээтилэр, бэйэлэрин өйдөбүнньүк бэлэхтэрин туттардылар.
Үөрүүлээх тэрээһин бүтүүтүгэр Кирилл Егорович Павлов, мустубут дьон иннигэр бэйэтин харда тылыгар, бүгүҥҥүттэн кини сааһа аны үс сыыппараттан турарын, маннык сааск этэҥҥэ тиийиитигэр киниэхэ дьиэ кэргэнэ, оҕолоро, чугас дьоно өйөбүл буолбуттарын, ону тэҥэ Саха сирин правительствотын кыһамньытын иһин улаханнык махтанарын биллэрдэ итиэннэ бүгүҥҥү үөрүүлээх күнү тэрийбиттэригэр ис сүрэҕиттэн махтанна.
Үөрүүлээх түгэн хаартыскаларын уонна К.Е. Павлов харда тылын видеотын t.me/dzulurgan каналга көрүөхүтүн сөп.
Петр ПАВЛОВ.
Ааптар хаартыскалара
Сообщение 100 сааһы сүһүөх үрдүгэр: Кирилл Павлов өрөгөйдөөх күнэ появились сначала на Улус Медиа.