«Хаарбах уонна саахалланар туруктаах дьиэттэн көһөрүү» бырагыраама көмөтүнэн эргэ мас дьиэлэргэ олорбут Бүлүү куоратын, бөһүөлэктэрин олохтоохторо толору хааччыллыылаах элбэх квартиралаах саҥа таас дьиэлэргэ көстүлэр, олорор усулуобуйаларын тупсардылар. Бу туһунан «Олох суола» хаһыат суруйар.
«Хаарбах уонна саахалланар туруктаах дьиэттэн көһөрүү» бырагыраама дойду бэрэсидьиэнэ Владимир Путин көҕүлээһининэн олоххо киирбит национальнай бырайыак чэрчитинэн ыытыллар. Бу көмөтүнэн Бүлүү улууһугар ааспыт үйэ 70-с сылларыгар тутуллубут хаарбах туруктаах иккилии мэндиэмэннээх мас дьиэлэртэн дьону толору хааччыллыылаах таас дьиэлэргэ көһөрүү тэриллибитэ.
Бастакы хас да мэндиэмэннээх элбэх квартиралаах таас дьиэ Бүлүү куоратын Аммосов уулуссатыгар үөрүүлээх быһыыга-майгыга арыллыбыта. Бырагыраама бастакы түһүмэҕин сылларыгар Бүлүү куоратын соҕуруу уонна илин өттүгэр тэтимнээхтик тутуллубут элбэх квартиралаах таас дьиэлэргэ элбэх ыал толору хааччыллыылаах квартираларга көһөрүллүбүтэ.
Бүлүү куоратыгар үстүү мэндиэмэннээх таас дьиэлэр саҥа кыбаарталлара баар буоллулар, кырдьаҕас куорат көстүүтүн тупсардылар.
2018 сыл сэтинньитигэр Бүлүү улууһа «Хаарбах уонна саахалланар туруктаах дьиэттэн көһөрүү» бырагыраама 2013-18 сыллардааҕы түһүмэҕин туолуутун отчуоттаабыта. Ити кэмҥэ 2017 сыллаахха диэри хаарбах туруктааҕынан билиниллибит дьиэлэргэ олорор дьон, сүрүннээн, саҥа дьиэлэргэ көспүттэрэ.
«Хаарбах уонна саахалланар туруктаах дьиэттэн көһөрүү» бырагыраама бастакы түһүмэҕэр тыа сиригэр — Тыымпыга 6 квартиралаах, Хампаҕа 12 квартиралаах уонна Халбаакыга таас икки 14 квартиралаах дьиэлэр тутуулара саҕаламмыта, ситэриллибитэ.
Өрөспүүбүлүкэ «Хаарбах уонна сахалланар туруктаах дьиэттэн көһөрүү» бырагырааматын 2019-25 сыллардааҕы иккис түһүмэҕинэн Бүлүү улууһун нэһилиэнньэлээх пууннарыгар элбэх квартиралаах дьиэлэр тутуулара былааннаммыта.
Ааспыт сылларга тутуу хайдах ыытыллыбытын билсиэххэ.
2019 сыллаахха Бүлүүтээҕи «Промстроймонтаж» ХЭУо Кыһыл Сыырга 1 элбэх квартиралаах дьиэни тутан үлэҕэ киллэрбитэ.
2020 сыллаахха Бүлүүтээҕи «Сигма» ХЭУо Кыһыл Сыырга 2 элбэх квартиралаах дьиэни, «Промстроймонтаж» Бүлүү куоратыгар Шахов уулуссатыгар 1 дьиэни үлэҕэ киллэрбиттэрэ.
2021 сыллаахха «Сигма» Бүлүү куоратыгар, «Промстроймонтаж» Кыһыл Сыырга 2-лии дьиэни туппуттара. «Элитстройком» ХЭУо Хампаҕа 257 кв.м. иэннээх 6 квартиралаах дьиэни үлэҕэ киллэрбитэ.
2022 сыллаахха «Востокпромстрой» ХЭУо Бүлүү куоратыгар 2 дьиэни туппута.
2023 сыллаахха Бүлүү куоратыгар «Востокпромстрой» уонна «Промстроймонтаж» 1-дии дьиэни үлэҕэ киллэрбиттэрэ.
2024 сыллаахха Бүлүү куоратын Бубякин уулуссатыгар «Промстроймонтаж» уонна «Сигма» 2 дьиэни туппуттара.
2025 сыллаахха «Промстроймонтаж» Бүлүү куоратын Мир уулуссатыгар элбэх квартиралаах дьиэни үлэҕэ киллэрбитэ.
Бырагыраама көмөтүнэн эргэ дьиэлэргэ олорбут 721 киһи 16,4 тыһ. кв м иэннээх 348 саҥа квартираларга көспүттэрэ, малааһын тэрийбиттэрэ.
Түмүктээн эттэххэ, «Хаарбах уонна саахалланар туруктаах дьиэттэн көһөрүү» бырагыраама көмөтүнэн 2012-25 сылларга Бүлүү улууһугар, сүрүннээн, Бүлүү куоратыгар, Кыһыл Сыырга федеральнай, өрөспүүбүлүкэ үптэринэн элбэх саҥа дьиэлэр тутулуннулар, дьон олорор усулуобуйаларын тупсардылар.
Николай Куприянов
Василина Татаринова хаартыската
Сообщение Бүлүү улууһугар көһөрүү бырагырааматынан элбэх киһи саҥа дьиэлэннэ появились сначала на Улус Медиа.