«Чолбон» сурунаал 100 сыллаах үбүлүөйүн көрсө Дьааҥы улууһа сурутуу хампаанньатын ыытта. Ол түмүгэр дьааҥылар 100-тэн тахса сурунаалы суруттулар.
Холобур, биирдиилээн нэһилиэктэринэн ыллахха, бу муус устар тиһэх күннэригэр элгэстэр 21 экземпляры, дулҕалаахтар 15-һи, сартаҥнар 7-ни суруйтардылар, үлэ өссө да барар. Манна эбии нэһилиэк дьаһалталара уонна тэрилтэлэр бэтэрээннэргэ анаан суруйтаран, бу буолаары турар ыам ыйынааҕы бырааһынньыктар күннэригэр туттарыахтара.
Акцияны хайдах ыыппыттарын көҕүлээччи, Дьааҥы улууһун мунньаҕын бэрэссэдээтэлэ Екатерина Ноговицына маннык кэпсээтэ:
– Быйыл сурунаал бас эрэдээктэрэ Гаврил Андросов «Улуу айаннар суолларынан» экспедиция чэрчитинэн Дьааҥыга кэлэ сырыттаҕына көрсүбүппүт. Онно сурунаал 100 сылын туоларын уонна сотору эрэдээксийэнэн биһиэхэ кэлэ сылдьыахтарын туһунан үөрүүлээх сонуну иһитиннэрбитэ. Ол иһин улуус дьаһалтатын дьыалаларын дьаһайааччы Айталина Шадрина, пресс-сэкирэтээр Владислав Кривошапкин уонна культура управлениетын үлэһиттэрэ буолан үлэлиир бөлөх тэринэн, Моисей Ефимов, Василий Дедюкин, Христофор Горохов, Дмитрий Дыдаев, Степан Юмшанов курдук суруйааччылардаах дойду сурунаал салгыы сайдарыгар бэйэбит кылааппытын киллэриэхтээхпит диэн санааттан 100 сылларынан 100 киһини сурутуохтаахпыт диэн сорук туруоруммуппут, 17 нэһилиэгинэн үллэрдэххэ бачча буолуон сөп диэн ааҕан-суоттаан былааннаабыппыт. Онтон нэһилиэк баһылыктарыгар ыҥырыы бырахпыппыт. Почта үлэтэ төһө да уустугун иһин, дьоммут-сэргэбит өйөөн, 100-тэн тахса киһи сурутан олус үөрдүбүт. Сыл өссө да уһун, өссө да сурутуохтара диэн эрэнэбит.
Муус устар 10–14 күннэригэр Гаврил Гаврильевич уонна эрэдээктэр Утум Захаров Арыылаах, Дулҕалаах, Верхоянскай, Баатаҕай, Элгэс нэһилиэктэригэр дьону-сэргэни кытта көрсөн, «Чолбон» сурунаал уонна саха литературатын тула кэпсэтиилэри ыыппыттара, Дьааҥы айар дьонун кытта сэһэргэспиттэрэ. Дьааҥыга айар-суруйар дьон үгүс. “Эчий” диэн литература түмсүүлээхпит. Рустам Каженкин, Елизавета Мигалкина курдук поэт ыччаттарбытынан киэн туттабыт. Эһиил саха норуотун поэта Моисей Ефимов төрөөбүтэ 100 сылын бэлиэтиэхпит. Байыаннай дьайыыга тыынын толук биэрбит талааннаах уолбут Василий Рожин олоҕо, айар үлэтэ сырдатыллар, кинигэлэрэ тахсыбыттара. Түгэнинэн туһанан, кинини үйэтитиигэ үлэлэһэр “Чолбон” сурунаалга, Саха сирин суруйааччыларын сойууһугар ис сүрэхпититтэн махтанабыт.
Биһиги холобурбутунан бу акцияны хас биирдии улуус тэрийэрэ буоллар, олус үчүгэй буолуо этэ. Дьааҥы курдук ыраах улууска кыаллыбыт буоллаҕына, атыттарга да сатаныа дии саныыбын. Онон саха тылын, литературатын үйэ тухары харыстаан, сайыннаран, тарҕатан кэлбит бастыҥ сурунаалбытын өйүөҕүҥ, 100 сылларынан улуус аайы аччаабыта 100-түү сурунаалы сурутуоҕуҥ!
Өссө ааҕыҥ:
Дьааҥы улууһа 100 «Чолбону» суруттарыа
Сообщение Дьааҥылар «Чолбон» сурунаалга бэлэхтэрэ появились сначала на Улус Медиа.