От ыйын 7 күнүгэр 1931 сыллаахха Нижегородскай уобалас Урень куоратын аэродромуттан По-2 диэн дьоҕус биплан-сөмөлүөт көтөн тахсыбыта. Бу дойду үрдүнэн салгын аала ойуур баһаарын буларга анаан бастакы көтүүтэ этэ. Онон от ыйын 7 күнэ Авиалесоохрана төрөөбүт күнүнэн ааҕыллар уонна бүгүн 95 сылын туолла.
Бастакы сөмөлүөт 1 чаас 33 мүнүүтэ устата көппүтэ. Көтүү Георгий Самойлович салайааччылаах ойуур авиациятын экспедициятын үлэтин чэрчитинэн оҥоһуллубута. Экспедиция от ыйын 7-11 күннэригэр үлэлиир кэмигэр сөмөлүөт 40 чаас көтөн, 1,5 мөл. гектар иэннээх харыстанар сиргэ 14 ойуур уотун булбута.
Онтон 1936 сыллаахха эмиэ Нижегородскай уобаласка сөмөлүөттэн парашюттаах дьон ыстаммыттара. Аан дойдуга бастакынан сэбиэскэй парашютист-баһаарынайдар уоту умуруорбуттара. Ити курдук эдэр энтузиаст-учуонай Георгий Мокеев этии киллэрэн, анал дьарыгы ааспыт, идэтийбит дьон көмөтүнэн уот саҥардыы туран эрдэҕинэ суһаллык умуруоруллар кыахтаммыта.
Саха сиригэр күөх суугуммутун салгынтан араҥаччылааһын үлэтэ 1944 сылтан саҕаламмыта. Оччолорго Дьокуускайга уонна Өлүөхүмэҕэ отделениелардаах Дьокуускайдааҕы ойууру кэтиир оройуон тэриллибитэ. Сэрии ыар кэмигэр бу хорсун стратегическай быһаарыы этэ. Хас сөмөлүөт ахсааҥҥа сылдьара. Дьокуускайдааҕы оройуон икки кэтээн көрөр лүөччүктээх икки По-2 сөмөлүөттээҕэ уонна киин оройуоннарга 4 660 уонна Өлүөхүмэҕэ 3 530 гектардаах тыалары араҥаччылыыра.
Бүгүн Саха сиринээҕи салгын аалларынан ойууру кэтээн көрөр база өрөспүүбүлүкэни бүтүннүү хабар 25 авиаотделениелаах. База начаалынньыгынан Арассыыйа үтүөлээх лесовода Владимир Леонов үлэлиир. Тэрилтэ холбоон 1 090 үлэһиттээх, ол иһигэр 850 десантник-баһаарынайдаах уонна 52 кэтээн көрөр лүөччүктээх итиэннэ 75 тиэхиньикэлээх. Авиалесоохрана үйэ ирдэбилинэн аныгы салгын аалын бары көрүҥнэрин туттар. Онон өрөспүүбүлүкэбит ойуура халлаантан бигэ харысхаллаах.
Василий Никифоров
Хаартыскалар Саха сиринээҕи Авиалесоохрана архыыбыттан туһанылыннылар.
Сообщение Бүгүн – дойду ойуурун салгын аалынан араҥаччылааһын күнэ появились сначала на Улус Медиа.