Бу күннэргэ «Якутскэнерго» ПАО уонна «Сахаэнерго» АУо салайааччылара арктическай улуустарга тиийэн үлэлээтилэр.
«Сахаэнерго» АУо пресс-сулууспата иһитиннэрбитинэн, «Якутскэнерго» ПАО генеральнай дириэктэрэ Гаврил Алексеев уонна «Сахаэнерго» АУо генеральнай дириэктэрэ Петр Кондратьев Муома уонна Абый улуустарыгар сылдьан, уотунан хааччыйар эбийиэктэр кыстыкка бэлэмнэрин бэрэбиэркэлээтилэр, үлэһиттэри уонна олохтоохтору кытта көрүстүлэр. Муома улууһугар салайааччылар Соболоох, Хонуу уонна Кулун Өлбүт сэлиэнньэлэригэр бүгүҥҥү балаһыанньаны кытта билистилэр. Хонуу уонна Кулун Өлбүт саҥа үлэҕэ киирбит эбийиэктэригэр ураты болҕомтолорун уурдулар. Муома РЭС салайааччыта Игорь Лушкин ыытыллыбыт өрөмүөн үлэтин түмүгүн билиһиннэрдэ. Бүгүҥҥү күҥҥэ былааннаммыт үлэ барыта олоххо киирбит. Ол курдук, 10 кВ «Соболоох – Победа» лиинийэтигэр тимир тирэхтэри бөҕөргөттүлэр. Саһыырга 2 №-дээх трансформатор ыстаансыйата, Хонууга, Кулун Өлбүккэ, Төбүлэххэ уонна Саһыырга диисэл тэриллэрин өрөмүөннээһин уонна уларытыы үлэлэрэ түмүктэннилэр. Уотунан хааччыйыы эбийиэктэрин кытта билсэн баран, оҥорон таһаарар эбийиэктэри көрүүнү сэргэ, олохтоохтору уонна олохтоох бэйэни салайыныы уорганнарын бэрэстэбиитэллэрин кытта көрсүһүүлэр буоллулар. Салайааччылар Соболоох уонна Индигиир национальнай нэһилиэктэрин актыыбын, улуус Сэбиэтин дьокутааттарын, ону тэҥэ Чыыбаҕалаах национальнай нэһилиэк олохтоохторун кытта көрсөн, дьон санаатын иһиттилэр.
Норуот дьокутаата Гаврил Алексеев олохтоох бэйэни салайыныы суолталаах боппуруостарын ырытта, Ил Түмэн 2026 сыллааҕы үлэтин-хамнаһын туһунан билиһиннэрдэ. Маны сэргэ, кини Муома улууһун үөрэҕириитин үлэһиттэрин сүбэ мунньахтарыгар кытынна.
Абый улууһугар Гаврил Алексеев уонна Петр Кондратьев Белогорскайдааҕы РЭС эбийиэктэригэр, ол иһигэр Кэбэргэнэҕэ уонна Белай Гораҕа дизельнэй электростанцияларыгар, ону тэҥэ уматык матырыйаалларын ыскылаатыгар сылдьан көрдүлэр. Белогорскайдааҕы РЭС сүрүн инженерэ Сарыал Борисов оборудованиелары уонна ситим комплексын күһүҥҥү-кыһыҥҥы кэмҥэ бэлэмнээһин хайдах барбытын туһунан иһитиннэрдэ. Өрөмүөн бырагырааматын чэрчитинэн Кэбэргэнэҕэ дизельнэй, 160 кВА кыамталаах «Индигирка» 8 №-дээх трансформаторнай ыстаансыйаларыгар сылдьан үлэ хаамыытын билистилэр. Белай Гораҕа бөһүөлэгэр КТП КОС акылаатын уурдулар. Оробуочай сырыы кэмигэр Майыар национальнай нэһилиэк олохтоохторун, Белай Гора улуустааҕы Сэбиэтин уонна бөһүөлэк Сэбиэтин дьокутааттарын, ону тэҥэ оройуон киинин олохтоохторун кытта көрсүһүүлэри ыыттылар.
«Якутскэнерго» ПАО уонна «Сахаэнерго» АУо салайааччылара бу маннык оробуочай сырыылара хотугу улуустарга эппиэттээх үлэ хаамыытын туругун, үлэһиттэр ноҕуруускаҕа төһө бэлэмнээхтэрин миэстэтигэр быһаччы сыаналыырга, ону тэҥэ нэһилиэнньэни кытта уотунунан хааччыйыы туһунан суолталаах боппуруостары дьүүллэһэргэ кыаҕы биэрэр.