Бүлүү куоратыгар ыытыллыбыт «Тиэргэнинэн ыллыыбыт» үтүө тэрээһин сэрии бэтэрээнигэр, үтүөлээх учууталга Николай Иванович Афанасьевка ананна. Бу туһунан «Олох суола» хаһыат суруйар.
Бүгүҥҥү күҥҥэ Саха сиригэр 7 сэрии бэтэрээнэ олороруттан үстэрэ – бүлүүлэр. 104 саастаах Семен Иванович Колтовской, быйыл 100 сааһын туолар Кирилл Егорович Павлов Дьокуускайга олороллор, былырыын 100 сааһын туолбут Николай Иванович Афанасьев Бүлүү куоратыгар олорор.
Улуу Кыайыы – ыам ыйын 9 күнүгэр анаммыт үөрүүлээх тэрээһиннэр Бүлүү куоратын Мир уулусса 70 «а» дьиэтигэр олорор 100 саастаах Бүлүү улууһун ытык кырдьаҕаһын Николай Иванович Афанасьевы эҕэрдэлиир «Тиэргэнинэн ыллыыбыт» үтүө тэрээһинтэн саҕаланнылар.
Сэрии бэтэрээнин оҕолор үҥкүү ансаамбыллара вальс үҥкүүлэн, оскуола үөрэнээччитэ Толя Варфоломеев, учуутал Камилла Семенова сэрии кэминээҕи ырыалары толорон эҕэрдэлээтилэр.
— Эн саллаат быһыытынан хорсуннук сэриилэспитиҥ. Саллаат сыалын-соругун толороро, онон, Улуу Кыайыы 85 сылын көрсөргө дьулуһуохтааххын. Ытык киһибитин Бүлүү дьонун-сэргэтин ааттарыттан Улуу Кыайыы күнүнэн эҕэрдэлиибин, — диэн сэрии бэтэрээнин улуус баһылыга Сергей Винокуров эҕэрдэлээтэ.
— Эн олоҕуҥ, оҕолору иитиигэ үлэҥ биһиэхэ улахан холобур буолар, Бүлүү куоратын дьонун аатыттан өссө уһун үйэни баҕарабын, — диэн куорат баһылыга Ян Попов сэрии бэтэрээнин истиҥник эҕэрдэлээтэ.
— Улуу Кыайыы күнүнэн эҕэрдэлиибин, ситиһиилэри баҕарабын!
Олоххо уларыйыы бөҕө тахсан эрэр. Оҕолор уларыйыыларга бэлэм, дойдугутугар бэриниилээх буолуохтааххыт, — диэн сэрии бэтэрээнэ, үтүөлээх учуутал Николай Иванович Афанасьев диэн мустубут оҕолорго, дьоҥҥо алгыс тылын эттэ.
Николай Иванович Бүлүүтээҕи педагогическай училищеҕа үөрэнэр кэмигэр судаарыстыбаннай диэйэтэл Гавриил Иосифович Чиряевы кытта биир паартаҕа олорбуттара, иккиэн фроҥҥа ыҥырыллан, милитаристскай Японияны үлтүрүтүспүттэрэ.
Сэрии кэмигэр Николай Афанасьев полка разведчига, дьоппуон тылыттан байыаннай тылбаасчыт этэ.
Сэрииттэн кэлэн баран эйэлээх олоҕу тутуһан барбыта, уучуутал идэтинэн айымньылаахтык үлэлээбитэ, өр сылларга Бороҕон оскуолатын ситиһиилээхтик салайбыта, элбэх кинигэ ааптара.
Кини оҕолору иитиигэ анаммыт олоҕо үрдүктүк сыаналаммыта. Николай Иванович Афанасьев — Саха Өрөспүүбүлүкэтин норуодунай учуутала, РСФСР уонна Саха АССР үтүөлээх учуутала, ССРС үөрэҕириитин туйгуна, Саха Өрөспүүбүлүкэтин, Дьокуускай куорат, Бүлүү улууһун, Бороҕон нэһилиэгин Бочуоттаах олохтооҕо.
Николай Куприянов,
«Олох суола».
Сообщение Бүлүүлэр сэрии бэтэрээнин Николай Афанасьевы эҕэрдэлээтилэр появились сначала на Улус Медиа.