“Авиалесоохрана” ФБТ дааннайдарынан, быйыл саас ыам ыйыгар өрөспүүбүлүкэ сиригэр-уотугар барытыгар уот турар куттала кыра буолар чинчилээх. Бэс ыйыгар Саха сирин соҕуруулуу-арҕаа уонна илин эҥээригэр элбэх сыллааҕы орто көрдөрүүттэн үрдүөн сөп. Чуолаан, ити кэмҥэ Уус Маайа, Таатта, Томпо, Өймөкөөн уонна Сунтаар, Мииринэй, Ленскэй улуустарыгар уот күүскэ көрдүгэнниирэ сабаҕаланар.
От ыйыгар маннык быһыы-майгы Уус Маайаттан ураты Амма, Чурапчы, Мэҥэ Хаҥалас, Нерюнгри, Алдан, Өлүөхүмэ, Хаҥалас улуустарыгар үөскүөн сөп. Атырдьах ыйыгар өрөспүүбүлүкэ арҕаа эҥээрин уонна киин өттүн тыаларыгар ойуур уота көрдүгэнниирэ уҕарыа суоҕа, өссө кэҥиэҕэ. Онно киирэллэр: Үөһээ Бүлүү, Ньурба, Сунтаар, Мииринэй, Өлөөн, Өлүөхүмэ, Ленскэй, Алдан, Нерюнгри, Уус Маайа, Амма, Мэҥэ Хаҥалас, Куорунай, Хаҥалас, Нам улуустара уонна Дьокуускай куорат.
Балаҕан ыйыгар илин сытар улуустартан Уус Маайа соҕотоҕун, уопсайынан, барыллаан билгэлээһиҥҥэ тоҕо эрэ барытыгар уонна бастакынан ааттанар. Онон сылыктаатахха, бу улуус быйылгы сайыммыт муҥутуур “итии туочуката” буолсу. Илин эҥээргэ кураан эргиллэр сибикитэ эбитэ дуу?..
Василий Никифоров
Хаартыска: “Авиалесоохрана” ФБТ
Сообщение Барыллаан билгэлээһин: быйыл сайын ойуур уота хайа улуустары түбүлүөй? появились сначала на Улус Медиа.