Саха Өрөспүүбүлүкэтин Үрдүкү Суута апелляция бэрээдэгинэн холуобунай дьыалаҕа наркотик эргиэнигэр буруйданар олохтоох киһи дьыалатын көрдө. Кини интэриниэт ситимин туһанан, бөлөҕүнэн эрдэттэн былааннаан улахан кээмэйдээх наркотигы атыылыырга соруммутугар Арассыыйа Холуобунай кодексын 228.1 ыст. 4 ч. «а, г» пууннарынан – 30 ыст. 3 ч. буруйданар. Бу туһунан СӨ сууттарын холбоһуктаах пресс-сулууспата иһитиннэрэр.
2024 сыл муус устар ыйыгар 18 саастаах Дьокуускай олохтооҕо микрозаймҥа иэстээх буолан быстах кэмҥэ, интэриниэккэ үлэ көрдүүр биллэрии таһаарбыт. Киниэхэ билбэт киһитэ «таблеткалары уурталыырга», наркотигы тарҕатарга харчы төлүүрүн туһунан этии киллэрбит. Уол сөбүлэһэн, кэпсэтээччитин ыйыытынан сабыылаах сибээс ханаалынан, хайдах үлэлиэхтээҕин, кистэлэҥ үлэ быраабылатын уонна төлөбүр усулуобуйатын быһаарбыт. Кини сокуону кэһэрин өйдөөн туран, наркотигы Дьокуускайга тарҕатарга сөбүлэһэн, буруйу оҥорууга кыттыспыт.
2024 сыл ыам ыйын 26 күнүттэн 30 күнүгэр диэри буруйданааччы Дьокуускайга харчыга наадыйан, барыһырар сыаллаах, силиэстийэ кэмигэр биллибэт киһини кытта кэпсэтэн мессенджер нөҥүө наркотиктаах аадырыһы ыларга уонна кистээн атыылыырга былааннаабыт. Ол эрээри кинилэр бу былааннара туолбатах: 2024 сыл ыам ыйын 30 күнүгэр буруйданааччыны ИДьМ Саха сиринээҕи управлениетын УНК 2-с салаатын үлэһиттэрэ Горькай уулуссатыгар турар дьиэлэр аттыларыгар туппуттар, оттон атыыга анаммыт наркотик былдьаммыт.
2024 сыл ыам ыйын 31 күнүн киэһэтигэр кимэ биллибэт киһи, буруйданааччы тутуллубутун билбэккэ, мессенджер нөҥүө киниэхэ Дьокуускай куорат Марха микро-оройуонугар наркотик кистэммит сириттэн ыларыгар соруйбут. Ол күн оперативнай-көрдүүр дьаһал түмүгэр кистэммит сиртэн 5,108 грамм ыйааһыннаах героиннаах бакыат ылыллыбыт.
Суукка буруйданааччы буруйун толору билиммит, ол эрээри көрдөрүү биэрэртэн Арассыыйа Федерациятын Конституциятын 51 ыстатыйатын туһанан аккаастаммыт.
Дьокуускай куорат суута эдэр киһини Арассыыйа Холуобунай кодексын 228.1 ыст. 4 ч. «г» пуунунан – 30 ыст. 1 ч. буруйдааҕынан билинэн, кытаанах эрэсиимнээх холуонньаҕа алта сылга көҥүлүн быһарга бириигэбэрдээбит.
Ол эрээри буруйданааччы бириигэбэри кытта сөбүлэспэккэ, үөһээ инстанцияҕа ааһыныы үҥсүүтүн суруйан, дьиҥнээх көҥүлүн быһар миэрэни тохтотон, усулуобунай миэрэни аныырга көрдөспүт.
Саха Өрөспүүбүлүкэтин Үрдүкү Суутун холуобунай дьыалаларга апелляциялыыр кэллиэгийэтэ, дьыала матырыйаалларын үөрэтэн уонна үҥсүү төрүөттэрин истэн баран, бириигэбэри уларытар эбэтэр көтүрэр төрүөттэри булбатах. Суут бириигэбэр буруйдааһыҥҥа сөп түбэһэр, сиэрдээх уонна сокуон ирдэбилигэр эппиэттиир диэн бэлиэтээбит. Бириигэбэр уларыйбатах, оттон үҥсүү өйөммөтөх.