«Сенеж» мастарыскыайыгар «Россия – страна возможностей» Бэрэсидьиэн платформатын «ТопБЛОГ» бырайыагын алтыс сезонун фиинала саҕаланна. Бу улахан тэрээһиҥҥэ Саха сирин чиэһин Татьяна Никифорова көмүскүүр.
Быйылгы куонкурус Арассыыйа, кини дьонун-сэргэтин уонна ситиһиилэрин туһунан ис сүрэхтэн киэн туттан кэпсиир төрүт контеҥҥа ананна. Биир түһүлгэҕэ 400-тэн тахса финалист уонна выпускник муһунна. Кинилэр бэйэлэрин үлэлэрин түмүгүн көрдөрүөхтэрэ, бүтэһиктээх тургутуулары ааһыахтара уонна эспиэрдэри, судаарыстыбаннай хамаандалары кытта медиа-бырайыактарын салгыы сайыннарар хайысхаларын быһаарыахтара.
Алтынньы 30 күнүгэр кыттааччыларга федеральнай биэдэмистибэлэр бэрэстэбиитэллэрэ, партнердар уонна биллиилээх блогердар холбоһуохтара – уопсайа түһүлгэ 750-тэн тахса киһини түмүөҕэ. Бу күн кыайыылаахтар ааттара биллиэҕэ.
Кыайыылаахтары наҕараадалааһын:
- Алтынньы 30 күнэ, 19:00 ч. (Москва бириэмэтинэн) — «VK Видео» нөҥүө быһа биэрии.
- Алтынньы 31 күнэ, 19:30 ч. (Москва бириэмэтинэн) — «Триколор» оператор «Большой эфир» телеханаалыгар тахсыаҕа.
Санатан эттэххэ, «ТопБЛОГ» бүтүн Арассыыйатааҕы бырайыага «Ыччат уонна оҕолор» национальнай бырайыак чэрчитинэн олоххо киирэр. Сааһыттан уонна олорор сириттэн тутулуга суох хас биирдии киһи https://topblog.rsv.ru саайтка бэлиэтэнэн кыттыан сөп.
«Россия – страна возможностей» платформа РФ Бэрэсидьиэнэ Владимир Путин көҕүлээһининэн 2018 сыллаахха тэриллибитэ. Бу түмсүү хас биирдии киһиэхэ, ханна олороруттан уонна туох идэлээҕиттэн тутулуга суох, сайдарыгар тэҥ кыахтары биэрэр аналлаах. Бу талааннаах дьон, устудьуоннар, урбаанньыттар, волонтердар уонна идэтийбит исписэлиистэр уопут атастаһар аһаҕас былаһааккалара буолар.