Сииттэ нэһилиэгэр мүөтүнэн үс ыал утумнаахтык дьарыктаммыттара балачча бириэмэ буолла.
Иван, Марианна Захаровтар, Гаврил Попов уонна Пётр Новгородов бэйэлэрэ анал пасекалаахтар. Кинилэр тыа сиригэр мүөтүнэн дьарыктанар олус тоҕоостоох диэн санааларын үөрэ-көтө үллэстэллэр. Этэргэ дылы, быраабылатын тутуһан, бириэмэтигэр сөп түбэһиннэрэн сөпкө дьаһаннахха элбэх мүөтү ылалларын бэйэбитинэн көрөн сөҕөн турардаахпыт. Марианна, Иван пасекаларыттан аҕалбыт мүөттэрин ситэри хайдах оҥороллорун көрдөрөөрү лааҕыр оҕолоругар анал экскурсия оҥорбуппут.
Билигин атыыга кэлэр мүөт арааһа элбэх, сыаналара да добуоччу. Дьиҥнээх натуральнай мүөтү, этэргэ дылы үчүгэйдик билбэт, быһаарсыбат киһи элбэх.
Оттон биһиги нэһилиэкпитигэр бу күннэргэ экологическай ыраас, натуральнай мүөттэр удамыр сыанаҕа атыыга таҕыстылар. Онон олохтоох бэйэлэрэ оҥорон таһаарар, сүрэхтэрин ууран туран үлэлэһэр дьоммутугар барҕа махталбытын тиэрдэбит.
Марианна Сивцева. Сииттэ, Кэбээйи улууһа.