Алтынньы 29 күнэ, аатыра сылдьыбыт Хомсомуол күнэ, хас биирдии дьоҥҥо олус күндү, кэтэһиилээх, долгутуулаах ураты бэлиэ күн.
Эдэр саас, устудьуон сыллардааҕы доҕоттору кытта алтыһар, үтүө үгэскэ кубулуйбут бырааһынньыкка, «Сэргэлээх» 70-80-с сыллардааҕы тутар этэрээтин байыастарын бөлөҕө Якутская уулусса 8 нүөмэригэр турар кырдьаҕастар уонна инбэлииттэр интэринээт-дьиэлэригэр эҕэрдэ кэнсиэринэн ыалдьыттаата.
Кэнсиэри «Аргыс» этэрээт биир бастыҥ байыаһа Елена Прокопьева салайда. Күүстээх куоластаах уолаттар Петр Никифоров, Анатолий Харбаев кыттыылаах хор толоруутугар «Песня о тревожной молодости», «Аан дойду ыччатын сүрэҕэ» ырыаларын көрөөччүлэр тэҥҥэ ыллаһа олордулар.
Кэнсиэри «Чэчир» этэрээт байыаһа Анна Попова салайааччылаах «Умсулҕан» ырыа-үҥкүү ансаамбыла сэргэхситтэ. Людмила Оконешникова, Петр Никифоров ырыаларын, Людмила Тарасова, Анна Павлова, Елена Прокопьева ааҕыыларыгар хоһооннору, Тамара Винокурова көрдөөх монологун көрөөччүлэр олус биһирээн ытыстарын тыаһа өрө хабылла олордо. Ырыалар быыстарыгар көрөөччүлэр, кыттааччылар үөрэ-көтө үҥкүүлээн сэргэхсийдилэр.
Түмүккэ култуурунай үлэни сүрүннээччи Варвара Асекритова Махтал суруктары салайааччыларбытыгар Анна Павловаҕа итиэннэ Анна Поповаҕа дохсун ытыс тыаһа доҕуһуоллаах туттарда.
Августина Владимирова-Хабарова.