Тиксиигэ ис туризм салгыы сайдар. Арктикаҕа сүүрбэттэн тахса сыл биисинэһинэн дьарыктанар олохтоох урбаанньыт Павел Герюгов өрөспүүбүлүкэ хотугу сирдэринэн айаннары тэрийэр, ыалдьыттары Заполярье ураты айылҕатын кытта билиһиннэрэр. Бырайыактарын олоххо киллэрэригэр киниэхэ судаарыстыба өйөбүлэ көмөлөһөр.
Павел Герюгов Тиксиигэ төрөөбүт уонна улааппыт. Кини урбаанньыт быһыытынан үлэтин норуоттар икки ардыларынааҕы научнай эспэдииссийэлэри тэрийииттэн саҕалаабыта. Билигин кини Тиксии ыалдьыттарыгар туундаранан айаннааһыны, снегоболотоходунан сырыыны, тууччахха балыктааһыны уонна Хотугу Саха сирин кэрэ-бэлиэ сирдэрин көрдөрөр. Турист маршруттарын биир уратытынан 10 тыһыынча сылтан тахса саастаах былыргы муустары көрүү буолар.
Туризм биисинэһэ сайдарыгар судаарыстыба өйөбүлэ улахан оруоллаах. 2020 сыллаахха Павел Герюгов хампаанньата Ростуризмтан 3 мөл. солкуобай суумалаах грант ылбыта уонна ол харчынан снегоболотоход атыыласпыта. Ону таһынан, урбаанньыт Саха сиринээҕи Урбааны сайыннарыы пуондатын чэпчэтиилээх микро-кирэдьиитинэн туһаммыта. Оттон «Мин биисинэһим» киин олохтоох салаата киниэхэ сүбэ-ама, иһитиннэрии өттүнэн мэлдьи көмөлөһөр.
Ол эрээри, Полярнай эргимтэ уҥуор урбаанынан дьарыктаныы бэйэтэ уустуктардаах. Туризм сайдыытын атахтыыр сүрүн биричиинэлэринэн – логистика, айан-сырыы сыаната ыарахана, инфраструктура, каадыр уонна олорор дьиэ тиийбэтэ буолаллар. Ыарахаттары көрбөккө, Павел Герюгов бэйэтин төрөөбүт дойдутугар дьыалатын салгыыр санаалаах.
«Мин дойдум манна баар, манна барытын билэбин, уонна миигин бары билэллэр. Бэйэбин атын сиргэ көрбөппүн», — диэн кэпсиир урбаанньыт.
Билигин Саха сирин айылҕатын, кэрэ-бэлиэ сирдэрин уонна турист маршруттарын туһунан иһитиннэриини сыыппара көмөлөһөөччүтэ нөҥүө билиэххэ сөп. Бу сервис өрөспүүбүлүкэ ыалдьыттарыгар да, олохтоохторго да аналлаах уонна Арктика территорияларыгар туризмы сайыннарарга улахан көмөлөөх.
Саха сирин Ил Дархана Айсен Николаев туризм салаатын сайыннарарга аныгы сыыппара технологияларын туһаныы суолталааҕын бэлиэтээн турар: «Биһиги улахан дааннайдарга олоҕуран, турист сырыытын күүһүрдэр, сынньанар табыгастаах сирдэри тэрийэр уонна өҥөнү оҥоруу хаачыстыбатын үрдэтэр кыахтаахпыт».
Санатан эттэххэ, «MAX» национальнай мессенджергэ Саха Өрөспүүбүлүкэтин Ил Дарханын уонна Бырабыыталыстыбатын официальнай иһитиннэрэр ханааллара үлэлииллэр. Манна эрэгийиэн сайдыытын, судаарыстыбаннай бырагыраамалар олоххо киириилэрин уонна суолталаах тэрээһиннэрин туһунан сонуннар бэчээттэнэллэр.
- Саха сирин Ил Дархана Айсен Николаев ханаала: https://max.ru/aisen_nikolaev
- Саха Өрөспүүбүлүкэтин Бырабыыталыстыбатын ханаала: https://max.ru/sakhagov