Саха дьоно сылын аайы көһүтэр, манаан көрөр тапталлаах күрэҕэ – Дыгын оонньуулара – күн бэҕэһээ түмүктэннилэр. Икки күннээх тыҥааһыннаах киирсиигэ 16 бастыҥ бөҕөс илин-кэлин түһүстүлэр. Түмүккэ Кэбээйи чулуулара Артем Дьяконов, Яков Дмитриев уонна Чурапчы боотура Павел Друзьянов чорбойон кыайыы көтөллөннүлэр. Бүгүн уолаттартан биирдэстэрэ, боруонса мэтээл хаһаайына Павел Друзьянов Улус.Медиаҕа ыалдьыттаата. Кини олоҕун уонна былааннарын туһунан сиһилии ааҕыҥ, сэргээҥ.
Павел Друзьянов Чурапчы улууһун Сылаҥ нэһилиэгиттэн төрүттээх. Кини билигин 2 оҕолоох ыал амарах аҕата, Дьокуускай куоракка баһаарынайынан үлэлиир. Павел успуорду оҕо эрдэҕиттэн сөбүлүүрүм, ол эрэн саха төрүт көрүҥнэрин кытта баара-суоҕа уонча сыллааҕыта билсибитим диэн билинэр:
“2017 сыллаахха Дыгын оонньууларын аатырбыт кыттыылааҕар Уйбаан Белолюбскайга, “Боотур” спортивнай кулуупка дьарыктанан саҕалаабытым. Онтон ыла саха төрүт көрүҥнэригэр сыстан, Дыгыҥҥа кыттар буолбутум”.
Быйылгы ситиһии – күүстээх дьарык түмүгэ
Дыгын оонньууларын анаан кэтээн көрөр дьон билэллэринэн, Павел быйыл номнуо 6-с төгүлүн күрэхтэстэ.
“Дыгыҥҥа киирэр иһин күрэххэ 9 төгүл кыттыбытым, олортон 6-та ааһан, Туймаада ыһыаҕын түһүлгэтигэр күрэхтэһэн турабын. Быйылгы оонньууларга үһүс миэстэ миэхэ улахан сыранан кэллэ. Атын сыллартан уратыта диэн, буолан ааспыт Дыгыҥҥа хаһааҥҥытааҕар да ордук бэлэмнээх, ситэн-хотон тиийдим диэн бэйэбин бэлиэтии көрдүм. Инники сылларга бэйэбэр эрэлим кыра буолар этэ – билигин ол суох, күүспэр, бэлэммэр эрэммитим, онон үөрэ-көтө, астына күрэхтэстим, холкутук сырыттым. Бу хас да сыллаах дьарык, дьаныардаах үлэ түмүгэ буолар.”, — диэн кини сэһэргиир.
Быйылгы күрэхтэһиигэ Павел Друзьянов чахчы чаҕылхайдык кыттар туһугар сыратын-сылбатын барытын ууран туран бэлэмнэммит. Кини дьарыгым профессиональнай спортсментан уратыта суохтук ааһар этэ, бүтэһик ыйдарга аҥардас Дыгыҥҥа бэлэмнэниинэн олордум диэн кистээбэккэ кэпсиир:
“Ас-үөл өттүгэр сөптөөх аһылыгы тутуһан, “кирдээх”, буортулаах аһы барытын рациоммуттан суох гынан тутуһа сырыттым. Маны таһынан, үс нэдиэлэ Нерюнгри куоракка доҕорбун Айсен Семеновы кытта бэйэбит сбор курдук бэлэмнэнии ааһан, Дьокуускай тэтимиттэн сынньанан кэлбиппит, онтуобут көмөлөстө дии саныыбын”.
Павел көрүҥ аайы туспа тренердэргэ дьарыктанан быйыл көрдөрүүтэ тупсарыгар күүскэ үлэлээбитин туһунан сэһэргиир. Кини сүрүн тренеринэн оччоттон баччаҕа диэри Уйбаан Белолюбскай буолар, ону кытта доҕоро, Дыгын оонньууларын хас да төгүллээх кыттыылааҕа Айсен Семенов, ыстаныыга атах оонньууларыгар рекордсмен Андрей Васильев, сүүрүүгэ Михаил Руфов, мас тардыһыытыгар Дьулустаан Ноговицын бэлэмнээбиттэр, оттон өй-санаа өттүнэн сааһыланарыгар Николай Слепцов-Сылык көмөлөспүт. Бу дьон бары быйылгы ситиһиибэр олук уурбуттара диэн Павел махталын биллэрэр.
Дьиэ кэргэн – сүрүн өйөбүл
Хайа да спортсмеҥҥа дурда-хахха, күүс-көмө, бастыҥ сүбэһит – кини дьиэ кэргэнэ. Ол курдук Павел Друзьянов ситиһиилэнэрбэр чугас дьонум өйөбүлэ сүҥкэн оруолу оонньоото диэн билинэр.
“Ойоҕум Валентина режиммын тутуһуннаран, аспын астаан, дьиэбитин, оҕолорбутун көрөн-истэн улахан көмө буолар, дьарыкпар аралдьыйбакка сылдьарбар усулуобуйа олохтоон кимнээҕэр да күүскэ кыһаллар. Мин санаабар, спортсмен кэргэннээх кэрэ аҥардар биһигиннээҕэр элбэх ыараханы ааһаллар, биһигиннээҕэр ордук тулуурдаахтар – кинилэр буолаллар биһиги бастыҥ өйөбүлбүт, көстүбэт фроммут.
Биллэн турар, хайа да күрэххэ үп-харчы өттүнэн улахан көмө наада буолар – маныаха спонсордарбар махтаныахпын баҕарабын. Өссө быйылгы оонньууга миигин хаһааҥҥытааҕар да төрөөбүт Чурапчым улууһа өйөөтө, ол иһин дойдум салалтатыгар, дьонугар-сэргэтигэр махталым муҥура суох”, — диир Павел.
Улахан күрэхтэһиигэ күүс-уох эрэ буолбакка, өй-санаа туруга эмиэ оруолу оонньуур. Ити өттүгэр спортсменнар эрдэттэн сааһыланыахтарын, бэлэмнэниэхтэрин наада диир сэһэргэһээччибит:
“Инники сылларга миэхэ өй-санаа өттүнэн бэлэмим соччото суох буолааччы. Билигин хомуллан, күрэхтэһиигэ атыннык сыһыаннаһар, “настройкаланар” буоллум, билиим, уопутум да элбээтэ”.
“Үс хатыҥ түһүлгэтигэр аатым ааттаныа диэн эрэллээхпин”
Дыгын оонньуулара миэхэ олоҕум аргыһа буолар, бэйэбин атын эйгэҕэ көрбөппүн даҕаны диэн Павел санаатын үллэстэр. “Аан маҥнай 2018 сыллаахха Дыгын түһүлгэтигэр үктэниэхпиттэн ыла ис-испиттэн этим-сииним бу күрэҕи көрдүүр буолан хаалбыта. Кырдьык, Дыгын түһүлгэтэ туспа тыыннаах – киһи тылынан сатаан быһаарбат уйулҕата. Ыҥыра, тарда турар буолар, онон сылын аайы манна кыттыаххын, күрэх амтанын билиэххин баҕараҕын”, — диир кини.
Быйылгы бириис фондата улаатан, кыттааччылар таһымнара үрдээн, күрэх бэрт сэргэхтик, уратытык ааста. Павел этэринэн, саҥа ааттар да, уруккуттан кыттар бөҕөстөр да кыайар кыахтара тэҥ этэ:
“Дыгын түһүлгэтэ миигин үс иһигэр киирэрбэр талбытыгар махтанабын, тоҕо диэтэр кыттааччылар бары кыайыыга дьулуурдаах, тэҥ баайыылаах этилэр. Түһүлгэҕэ киириэм иннинэ үгэс быһыытынан сирбин аһатан, айыыларбар махтана, сүгүрүйэ сырыттым, онон барыта табылынна дии санаатым”.
Павел кэлэр сылларга Дыгын оонньууларыгар салгыы кыттар былааннааҕын кэпсээтэ. Кини сиһин этэ ситэн, буутун этэ буһан, ис-иһиттэн дьэ арыллан эрэрин бэлиэтээтэ.
“Сүрэх баҕатын сүһүөх уйарын тухары кыттан иһиэҕим. Саха эр киһитэ 30 сааһын кэннэ ситэр дииллэр дии, ол иһин мин аатым Үс Хатыҥ түһүлгэтигэр өссө да ааттаныа, Дыгын историятыгар киириэ диэн бүк эрэллээхпин”, — диэн бөҕөс түмүктээтэ.
Хаартыска Павел Друзьянов архыыбыттан
Также читайте:
Артем Дьяконов стал абсолютным победителем Игр Дыгына–2026
Сообщение Чурапчы чулуута Павел Друзьянов: “Үс Хатыҥ түһүлгэтигэр аатым ааттаныа” появились сначала на Улус Медиа.