Кэбээйигэ ыытыллар Олоҥхо ыһыаҕа ураты тыыннаах. Манна өрөспүүбүлкэ араас муннугар таалаан олорор хотугу норуоттар бэрэстэбиитэллэрэ бары кэриэтэ мустубуттар. Ыһыах ыалдьыттара бу омуктар култуураларын, үгэстэрин кытта билсэллэр, маны тэҥэ аҕыйах ахсааннаах омуктар сэдэх тылларынан кэпсэтэллэрин, ырыаны-тойугу, хоһоону кэрэхсии истиэххэ сөп.
Манна даҔатан эттэххэ, төрүт үгэскэ олоҕурбут уус-уран оҥоһуктар көрүүлэрэ дьон-сэргэ биһирэмин, болҕомтотун ылыан ылла. Күрэххэ 10 улуустан 35 маастар үлэтэ хас да ураһанан тэлгэнэн ыһыах устата көрдөрүүгэ турар. Дьүүллүүр сүбэ киирбит уус-уран оҥоһуктары түөрт хайысханан сыаналаан бастыҥнары быһаарда.
Бастакы көрүҥ — тирииттэн көбүөрдэр уонна олбохтор көрүүлэрэ. Манна кыттааччылар таба тириититтэн эрэ буолбакка, чубуку, тайах тириититтэн дьэрэкээн панно-көбүөрдэри оҥорон аҕалбыттар. Үлэлэр барыта төрүт үгэскэ олоҕуран илиинэн тигиллибиттэр, хас биирдии оһуора мандара ымпыгар диэри кичэллэн оҥоһуллубута киһи хараҕар хатанар. Манна бастыҥ үлэнэн Абый маастарын Атласова Изольда үлэтэ ааттанна.
Иккис көрүҥ — табаһыттар уонна булчуттар таҥастара. Дьүүллүүр сүбэ бэлиэтииринэн, хотугу олохтоох норуоттар күннээҕи олохторугар, дьарыктарыгар сөп түбэһэр таҥаһы тигии бэйэтэ туспа ньымалаах буолар. Бэргэһэтиттэн саҕалаан этэрбэһигэр тиийэ барыта туттарга табыгастаах уонна, сүрүнэ, туундара тыйыс тымныытын, ыстаада олоҕун тулуйар толору кэмпилиэк таҥас буолуохтаах. Табаһыттарга “уостаах үтүлүк” диэн өйдөбүл баар эбит. Бу ытыс сирэйигэр баар хайаҕас. Кини көмөтүнэн, тымныыга үтүлүгү устубакка үлэни салгыы оҥороҕун. Бу көрүҥҥэ бастакы миэстэни Кэбээйи улууһун Сэбээн Күөлүттэн норуот маастара — Протопова Елена ылла. Бэлиэтээн эттэххэ, Сэбээн Күөлүн дэлэгээссийэтэ Олоҥхо ыһыаҕар бөртөлүөтүнэн көтөн кэлбит.
Үһүс көрүҥ — “Эмгун” диэн ыҥыыр күрэҕэ. Манна Муома улууһуттан Никулина Акулина бастаата. Кини оҥорбут ыҥыыра күннээҕи туттарга бары өттүнэн ымпыгар-чымпыгар диэри толкуйдаммыт. Холобур, мал уурар долбуурдаах. Олбоҕо сымнаҕас буоллун диэн кырпаламмыт таба түүтүнэн оҥоһуллубут.
Төрдүс көрүҥ — “Һэрук” суумка күрэҕэ. Манна Муома, Өлүөхүмэ, Орто Халыма эбээннэрэ уонна эбэҥкилэрэ кытыннылар. Бу көрүҥҥэ Өлүөхүмэ улууһун Тээнэ нэһилиэгин Трынкина Капитолина үлэтэ бастыҥынан ааттанна. Кини тайах тириитин инчэҕэйдии тигэн, суумка форматын хатаран оҥорбут.
Хотугу аҕыйах ахсааннаах норуоттар уус уран оҥоһуктарын күрэҕэ төрүт үгэстэри сөргүтүүгэ, харыстыырга уонна көлүөнэттэн көлүөнэҕэ тиэрдэн иһэргэ үтүө сабыдыал буолар.
Сообщение Хотугу аҕыйах ахсааннаах норуоттар түһүлгэлэригэр өбүгэ үгэһин сөргүтэллэр появились сначала на Улус Медиа.