Бэҕэһээ, муус устар 8 күнүгэр, Ил Түмэн тыа сиригэр уонна аграрнай бэлиитикэҕэ сис кэмитиэтин төгүрүк остуолугар муниципальнай оройуоннар уонна куораттардааҕы уокуруктар олохтоох салайыныыга уорганнарыгар бэриллибит судаарыстыба тыа хаһаайыстыбатын үлэтин өйүүр сорох боломуочуйаларын хааччыйыыга көрүллэр көмө харчы төһүүтүн уонна ааҕыллар ньыматын уларытыыны дьүүллэстилэр.
Эрдэ иһитиннэрбиппит курдук, бу боппуруоһу быйыл саас кулун тутарга Нам сэлиэнньэтигэр, Бүлүү куоракка уонна Аллараа Бэстээххэ улуустары олорор түбэлэринэн (киин, Бүлүү сүнньүнээҕи уонна илин эҥээрдээҕи) бөлөхтөөн мунньан, киэҥник ырыппыттара. Тыа хаһаайыстыбатын уонна ас-үөл бэлиитикэтин министиэристибэтэ тэрийбит стратегическай сиэссийэлэригэр уончалыы улуустан 100-чэлии, 150-чалыы киһи, аһы-үөлү оҥорон таһаарыыга быһаччы үлэлии сылдьар хаһаайыстыбалар салайааччыларыттан, исписэлиистэриттэн саҕалаан нэһилиэктэр, улуустар баһылыктарыгар тиийэ кыттаннар, санааларын этиммиттэрэ.
Онон Ил Түмэҥҥэ кэпсэтии соломмут, тэпсиллибит суолунан курдук сулбурҕатык, судургутук барда. Сүрүннээн, дьокутааттар – Александр Атласов бэрэссэдээтэллээх тыа сирин уонна аграрнай бэлиитикэ сис кэмитиэтин чилиэннэрэ, бырабыыталыстыбаттан бэрэссэдээтэли солбуйааччы Сергей Местников, экэниэмикэ миниистирэ Петр Попов, үп миниистирэ Иван Алексеев уонна туһааннаах министиэристибэ, биэдэмистибэлэр, тэрилтэлэр салайааччылара, эппиэттээх үлэһиттэрэ бааллар. Тыа хаһаайыстыбатыгар быһаччы үлэлии сылдьааччылар аҕыйахтар, Намтан уонна Чурапчыттан кэлбиттэр. Улуустар баһылыктара эмиэ ыҥырыллыбыттар эрээри, биир даҕаны кулуба көстүбэт. Арай, “ВКС”-ка хатанан олордулар ини диэххэ.
Миниистир Артем Александров тыа хаһаайыстыбатын өйүүр төһүүлэри уларытыы 3 барыйаанын туһунан иһитиннэриитин кэнниттэн дьокутаат Елена Голомарева хотугу улуустарга анаан туспа көрүллүбэтэҕин, холобур, Дьокуускайга уонна Дьааҥыга иитиллэр сылгыларга биир кээмэйдээх өйөбүл оҥоһулларын, хомуньуус дьокутаат Вячеслав Куличкин министиэристибэ үс аҥы буолбакка, биир сиппит-хоппут барыйааны дьүүллэһиигэ таһаарыахтааҕын тутустулар. Дьокутаат Дмитрий Поисеев улуустар боломуочуйаларын кэҥэтэн, саҥа мэхэньииһиминэн сыл эрэ үлэлээт тоҕо, туохтан төрүөттээн уларыталларын ыйыппытыгар миниистир бастакы түһүмэҕи саҕалыылларыгар иккис түһүмэххэ мэхэньииһим чочуллуохтааҕын, тупсарыллыахтааҕын торумнаабыттарын, ол кэлэр 2027 сылтан нолуок сокуонугар уларытыы киллэриллэриттэн төрүөттээҕин быһаарда.
Дьокутааттар уонна тыл эппит ыҥырыылаахтар, үтүктүспүт курдук, санаалара биирдиҥи буолла. Тыа хаһаайыстыбатын уонна ас-үөл бэлиитикэтин министиэристибэтэ судаарыстыба өйүүр төһүүлэрин уларытарга оҥорон киллэрбит 3 барыйааныттан иккиһи – табаары оҥорон таһаарыыны, ол эбэтэр оҥоһуллан тахсыбыт үүт-эт бородууксуйа кээмэйинэн көрөн өйүүр суолу талалларын биллэрдилэр. Эрдэтээҥи дьүүллэһиилэргэ “министиэристибэ бэйэтэ туспа барыйааннаах буолуохтаах” диэн уорбалааччылар бааллара. Бу сырыыга миниистир А.А. Александров хаартыны дьэ арыйан, ону киэр кыйдаата. “Биһиги дьоҥҥо-сэргэҕэ охсуута суоҕунан барыахтаахпыт. Ол өттүнэн көрдөххө, 2-с барыйаан ордук чугас”, – диир Артем Александрович.
Төгүрүк остуолу салайан ыыппыт кэмитиэт бэрэссэдээтэлэ Александр Атласов кэпсэтиини түмүктүүрүгэр санааны атастаһыыга кыттыбыт дьон этиилэрин бээтинсэни аһарбакка чочуйан киллэрэллэригэр эттэ. Министиэристибэ 3 бөлөҕүнэн улуустарга уонна парламеҥҥа тэриллибит дьүүллэһиилэргэ киирбит этиилэри аахсан оҥорбут барылын Ил Түмэн аны сайын бэс ыйын ортотугар буолуохтаах пленарнай мунньаҕар бастакытын ааҕалларын, онтон бүтэһигин сэтинньитээҕи сиэссийэҕэ көрөн ылаллара былааннанарын туһунан Александр Павлович иһитиннэрдэ.
Василий Никифоров
Василий Кононов (Ил Түмэн) хаартыскаҕа түһэриилэрэ
Сообщение Ил Түмэн төгүрүк остуола: аһы-үөлү оҥорон таһаарыыны өйүүр суолу таллылар появились сначала на Улус Медиа.