Быйылгы Олоҥхо Ыһыаҕар «Саха сирин улуустарын амтана» ас-үөл быыстапката бастакытын ыытылынна. Кэбээйи ытык сиригэр өрөспүүбүлүкэ 11 араас муннугуттан бастыҥ асчыттар тоҕуоруһаннар, мааны сандалы тардан ыалдыттары күндүлээтилэр. Кыттааччылар бары ох курдук оҥостон, ас эгэлгэтин бэлэмнээн кэлбиттэр. Улус.Медиа кэрэспэдьиэнэ ыалдьыттары кытта сиһилии кэпсэттэ.
Хас биирдии улуус түһүлгэҕэ дэлэй астаах остуолу бэлэмнээбит. Кыттааччылар бары айаны ыраах, суолу уһун диэбэккэ, ас арааһын астаан кэлбиттэрин киһи көрөн сөҕөр-махтайар. Улуустар остуол тула араас кэрэ көстүүлээх эт-үүт, балык бүлүүдэни кэлбит ыалдьыкка барытыгар амсаттылар.
Өймөкөөн курдук тэйиччи сытар улуустан кыттааччылар икки күн устата айаннаан кэлбиттэр. Кинилэр Олоҥхо Ыһыаҕар бэйэлэрин бастыҥ астарын билиһиннэрбиттэриттэн олус үөрбүттэр.
«Биһиги Өймөкөөн улууһуттан уопсайа 30-ча киһи буолан кэлбиппит. «Саха сирин улуустарын амтана» быыстапкаҕа саха уонна эбээн норуоттарын төрүт астарын астаан аҕаллыбыт. Ол курдук, биһиги сандалыбытыгар убаһа, таба уонна ынах этиттэн оҥоһуллубут деликатестары көрүөххэ сөп. Ону кытта, биллэн турар, хоту улуус буоламмыт балыга суох сатаммаппыт. Саамай киэн тутта ааттыыр, амсатар аспытынан буолар үөрэ оттоох миин — Өймөкөөҥҥө кэлбит киһи бу миини хайаан да боруобалыахтаах. Маны таһынан, дьон олус суохтуур уонна сөбүлээн сиир аһын — куобах астаан аҕаллыбыт», — дииллэр Айталина Иванова, Любовь Иванова, Марина Кривошапкина.
Хаҥаластан сылдьар Вера Семеновна уонна Валерий Дмитриевич Варфоломеевтар 20-чэ көрүҥ ас астаан аҕалбыттар. Бүлүүдэлэри бэлэмнииргэ Варфоломеевтар бары доҕотторо, билэр дьоно көмөлөспүттэр.
«Кыттааччылар аҕалбыт астара барыта наһаа минньигэс, кыраһыабай көстүүлээх. Биһиги эмиэ туох баар хаһааспытын хостоон, сандалыбыт дэлэччи астаах буоларыгар кыһаллыбыппыт. Тэрээһини олус сөбүлээтибит, астынныбыт. Кэлбит дьон бары үөрдүлэр, онон бу үгэс салҕанан, сылын аайы ыытыллара буоллар кыттааччы элбээн, быыстапка сайдан иһиэ этэ», — диэн үллэстэр Вера Семеновна.
Тэрээһин түмүгэр кыттааччылар уонна дьүүллүүр сүбэ Олоҥхо Ыһыаҕар асчыттар түһүлгэлэрэ баар буолуон баҕаралларын туһунан сэһэргэстилэр. Маны тэҥэ, саха төрүт аһын сөргүтэргэ, дьиҥ былыргылыы астыыр ньымалары үөрэтэргэ сыал-сорук туруон наада диэн торумнастылар.
Хаартыскалар: ааптар уонна Эвелина Попова
Сообщение Саха сирин улуустара Олоҥхо Ыһыаҕар бастыҥ астарын амсаттылар появились сначала на Улус Медиа.