Нам улууһугар СӨ Ыччат дьыалатыгар уонна социальнай коммуникацияҕа миниистирэ, СВО кыттыылааҕа Петр Шамаев салайааччылаах өрөспүүбүлүкэ ыччатын десана үлэлээтэ. Бу туһунан «Эҥсиэли» хаһыат суруйар.
Бу сырыыны министр Петр Витальевич бэйэтинэн көҕүлээтэ. Кини ыччаттары кытта тэӈӈэ үлэлээн, кыаммат, кырдьаҕас, СВО ыалларыгар көмөлөстүлэр.
Ол курдук, 150-ча ыччат, ХИФУ устудьуоннара, муус устар 11 күнүгэр улууспут 5 нэһилиэгэр күргүөмнээхтик, хорутуулаахтык үлэлээтилэр.
Арбын
Алта ыал хаарын ыраастастылар, муустарын харайдылар.
Оскуола спорт былаһааккатыттан, нэһилиэк оҕо былаһааккатыттан хаардарын тастылар.
Оскуола оҕолоругар профориентационнай бэсиэдэ аахтылар.
1 Хомустаах
Устудьуоннар оҕо былаһааккаларыгар, сквергэ, детсад тиэргэнигэр үлэлээтилэр. Түөрт ыалга көмөлөстүлэр.
ХИФУ медицинскэй факультетын 1, 2 кууруһун устудьуоннара «Улыбка» детсад ветераныгар тиийдилэр.
Мария Петровна Сысолятина, «Улыбка» детсад ветерана:
— Детсад салалтата ветераннарга сайаапканан десант байыастарын көмөҕө ыыталаата. Миигин тэӈэ өссө Муксунова Мария Павловна диэн ветераӈӈа эмиэ көмөлөһө сылдьаллар.
Тэлгэһэм саас ууланар. Киирэрбэр-тахсарбар ыарахаттардаах буолааччы. Ол иһин хаарбын ыыраастатарга сайаапка биэрбитим. Оҕолор хаачыстыбалаахтык үлэлииллэр эбит. Маладьыастар!
Хаарбын хортуоппуйум бааһынатыгар тастардым.
Бу иннинэ маннык көмөнөн хаһан да туһамматаҕым. Онон ыччаттарга, детсад сэбиэдиссэйигэр Нь.М. Баишеваҕа, профсоюз председателэ Л.Н. Поповаҕа көмө оӈорбуттарыгар махтанабын!
2 Хомустаах
Суолу, смотровой хаарын ыраастаатылар.
Фрунзе
Алта ыалга көмөлөспүттэр.
Үс бырысыап мас хайыппыттар.
Кырыыһаттан хаар түһэрбиттэр. Нэһилиэк былаһааккатыттан хаарын ыраастаабыттар.
Көбөкөн
Соҕотох олорор Зырянова В.А. хаарын ыраастаабыттар, мууһун баахха хаалаабыттар. СВО дьиэ кэргэнэ Макитова В.Н. хаардарын таспыттар. Соҕотох олорор Сивцева О.И. дьиэтин аанын кирилиэһин өрөмүөннээбиттэр. Инбэлиит Лукин О. И. дьиэтин кырыыһатыттан хаарын түһэрбиттэр.
Инбэлиит Петрова Е.С. теплицатыгар хаар киллэрэн куппуттар. Соҕотох олорор Местникова З.П. хаарын ыраастаабыттар, Рехлясова А.А., Жирков Н.Л. муустарын баахха хаалаабыттар. СВО дьиэ кэргэнэ Осипова А.С. хаарын ыраастаабыттар. Бочкарева В.В. мууһун дьаһайбыттар.
Нэһилиэккэ кэлбит полистиролу сааһылаабыттар, шлакоблок таспыттар.
—Эдэр ыччат политикатынан М.К. Аммосов аатынан Хотугулуу -илиҥҥи федеральнай университет 29 устудьуона Ильина Мария Александровна салайааччылаах Көбөкөн нэһилиэгин аҕам саастаах дьонугар, СВО кыттыылаахтарыгар уонна дьиэ кэргэттэригэр күүс-көмө буолан үлэлэрин саҕалаатылар,— диир нэһилиэк дьаһалтатын баһылыгын солбуйааччы Октябрина Сокольникова.
Ыччат десана Көбөкөҥҥө бэҕэһээ кэлбит, нэһилиэк ыччата бэтэрээннэр балаҕаннарыгар истиҥник көрсүбүттэр. Бүгүн аҕам саастаахтарга аадырыстаах көмөнү оҥоро үлэлии тарҕаспыттар.
Февронья Дмитриевна Потапова, Көбөкөн олохтооҕо, 73 саастаах:
— Бүгүн киэҥ нэлэмэн Көбөкөммөр күн чаҕылыччы тыган турдаҕына, 2 уол, 1 кыыс эдэркээн оҕолор кэлэн, дьиэбит кырыыһатыттан хаары түһэрэн, таарыччы кыладыапканы эмиэ ыраастаан, таһан сэргэхсийэн олоробут. Араас факультекка үөрэнэр, элэккэй оҕолор кэлэн көмөлөһөн, бэйэлэрэ үлэлээн, сэргэхсийэн, үөрэн-көтөн бардылар.
Студеннарга улаханнык махтанныбыт. Кэргэмминээн иккиэн олоробут. Куоракка баар кыыһым аах истэн эмиэ үөрдүлэр, инньэ гынан хаайтарыы иннинэ манна үлэлии кэлбэт буоллулар. Түгэнинэн туһанан, олохтоох дьаһалтаҕа, студент оҕолорго өссө төгүл махталбытын тиэрдэбит. Билигин ыалдьыттарбыт, эдэр оҕолор, кэнсиэртэрэ буолар, ону көрө баран эрэбит.
Көбөкөӈӈө Сэргэлээх студгородогун 17-с куорпуһун уонна 9/1 уопсайын активистара үлэлээтилэр.
Хаартыска: устудьуоннар тиксэриилэрэ
Сообщение Ыччат десана Намҥа: биир күн биэс нэһилиэккэ появились сначала на Улус Медиа.