Бу кэмҥэ Өлүөнэ көмүөлүн алын кирбиитэ Хаҥалас улууһун Иһит сэлиэнньэтин ааһан, Кытыл Дьураа диэки дьулурҕатык айанныыр. Билиҥҥи туругунан Иһит аннынан муус хойуутук устарын, оттон Кытыл Дьураа аннынан уу эбиллэн, муус көтөҕүллэн эрэрин туһунан Өлүөнэ тардыытынааҕы уу салалтатыттан иһитиннэрдилэр.
Гидрологтар улахан эбэ мууһа эстэрин Покровскай куорат аннынан бүгүн-сарсын, онтон Дьокуускай куорат туһаайыытынан ыам ыйын 16-17 күннэригэр сабаҕалыыллар.
Билиҥҥи үйэҕэ ким баҕалаах Өлүөнэ көмүөлүн дьиэтигэр эбэтэр үлэтигэр олорон, кэтээн көрүөн сөп. Росводресурс Өлүөнэ тардыытынааҕы уу салалтата сааскы халаан кэмигэр Дьокуускай куоракка онлайн-трансляцияны тэрийэр. Бэҕэһээ, ыам ыйын 13 күнүгэр, “Водоканал” тэрилтэ ууну мунньар-ыраастыыр ыстаансыйатын аннынан көмүөл хайдах ааһарын көрдөрөр хаамыраны холбоотулар. Сарсын, ыам ыйын 15 күнүгэр, чохтоох Хаҥалас хайатын үрдүттэн көрөр “быһа эфир” эбиллиэ.
Маннык тэринии, бастатан, көмүөл кэмигэр харыы таҕыстаҕына, нэһилиэнньэлээх пууннары халаан уута ылар кутталын туһааннаах сулууспалар суһаллык дьаһанан намыраталларыгар туһуланар. Ол эрээри, ким баҕарар Rutube медиаплатформаҕа https://rutube.ru/channel/43628105/ ссылканан киирэн, Өлүөнэ тардыытынааҕы уу салалтатын официальнай ханаалынан кэтээн көрөр кыахтаах.Тэрийээччилэр онлайн-трансляция кэмигэр тэхиньиичэскэй харгыс үөскүүр түбэлтэтигэр быһа ссылка уларыйыан сөбүн сэрэтэллэр, онон ханаалга сурутарга сүбэлииллэр.
Василий Никифоров
Сообщение Өлүөнэ көмүөлүн алын кирбиитэ Иһит сэлиэнньэтин ааста появились сначала на Улус Медиа.