Бүгүҥҥүттэн, ыам ыйын 15 күнүттэн, Тыа хаһаайыстыбатын уонна ас-үөл бэлиитикэтин министиэристибэтэ тыа сирин бэкээринэлэригэр субсидия бэриллэригэр анаан докумуоннары тутууну саҕалаата.
Министиэристибэ өрөспүүбүлүкэ бырабыыталыстыбатын “Саха Өрөспүүбүлүкэтин судаарыстыбаннай бүддьүөтүттэн тыа сиринээҕи бэкээринэлэр үлэлэрин өйөөһүҥҥэ субсидияны биэриигэ сүүмэрдээһини ыытыы бэрээдэгин туһунан” диэн бу дьыл кулун тутар 26 күнүнээҕи 93-с №-дээх уурааҕар олоҕуран, сүүмэрдээһини ыытарын туһунан бирикээһи ыам ыйын 13 күнүгэр таһаарда.
Санаттахха, Саха сиригэр килиэби астааһын дьыалата туох баар кыһалҕатын кытта 2026 сылтан Тыа хаһаайыстыбатын уонна ас-үөл бэлиитикэтин министиэристибэтигэр сүктэриллэн турар. Судаарыстыба өйөбүлэ тыа сиригэр килиэби астааһын кээмэйин улаатыннарар сыаллаах. Куонкуруска кыттарга сайаапканы тыа сиригэр килиэп уонна килиэп-буулка оҥоһуктары астыыр тэрилтэлэр уонна урбаанньыттар биэриэхтэрин сөп. Докумуоннары бүгүҥҥүттэн бэс ыйын 14 күнүгэр диэри “Электроннай бүддьүөт” тиһиккэ электроннай көрүҥүнэн тутуохтара.
Мунаардаххытына, АПК ресурсаларынан хааччыйар киинин судаарыстыба өйөбүлүгэр салаатын исписэлиистэригэр 88001002526 уонна 89148203108 төл. эрийэн чуолкайдаһыҥ.
Василий Никифоров
Хаартыска: «Томпо илдьитэ»
Сообщение Тыа сирин бэкээринэлэрин өйүүргэ көмө үп тиийиэ появились сначала на Улус Медиа.