Үөһээ Бүлүү улууһун Харбалаах нэһилиэгэр VI төгүлүн ыытыллыбыт «БАСХАН – 2026» өрөспүүбүлүкэтээҕи дьыалабыай оонньуу чаҕылхай түмүгэ билиннэ. Судаарыстыбаннай уонна бэлитиичэскэй диэйэтэл Степан Васильев төрөөбүтэ 130 сылыгар уонна Үөһээ Бүлүү улууһугар Үөрэхтээһин тэриллибитэ 150 сылыгар аналлаах VI өрөспүүбүлүкэтээҕи «БАСХАН – 2026» дьыалабыай оонньуу Үөһээ Бүлүү сиригэр үрдүк таһымнаахтык, этэҥҥэ ыытылынна.
Икки күн устата Саха сирин бастыҥтан бастыҥ, лиидэр уолаттара «Удьуор утум», «Өркөн өй», «Дойду салайааччыта», «Мөккүөр» уонна «Айыы умсулҕана» курдук ыарахан, ол эрэн олус дириҥ ис хоһоонноох түһүмэхтэри аастылар.
Басхан-2026 кыайыылаахтара:
КЫЛААН КЫАЙЫЫЛААХ — Никонов Айхал Иванович (өрөспүүбүлүкэтээҕи лиссиэй-интэринээт, Дьокуускай куорат);
I ҮРДЭЛ — Семенов Тимур Павлович (Харбалаах орто оскуолата, Үөһээ Бүлүү улууһа);
II ҮРДЭЛ — Луковцев Богдан Иннокентьевич (В.В. Филиппов аатынан гимназия, Горнай улууһа);
III ҮРДЭЛ — Михайлов Андрей Павлович (С.К. Макаров аатынан гимназия, Чурапчы улууһа).
Бу күрэххэ кыттыбыт хас биирдии уол — бэйэтин улууһун киэн туттар ыччата, кэлэр кэскиллээх салайааччыта. Экспертэр бары кыттааччылар билиилэрин, тобуллаҕас толкуйдарын уонна салайар дьоҕурдарын үрдүктүк сыаналаатылар.
Анал ааттарынан наҕараадаланнылар:
«Удьуор утума салҕыыр БАСХАН» — Лобанов Эрчим (Мэҥэ Хаҥалас);
«Сайдам санаа БАСХАНА» — Саввинов Уйгун (Кэбээйи);
«Өркөн өй БАСХАНА» — Пономарев Арылхан (Чурапчы);
«Хомоҕой тыл БАСХАНА» — Сергучев Михаил (Сунтаар);
«Ылыннарыылаах тыл БАСХАНА» — Николаев Андриян (Үөһээ Бүлүү);
«Элбэҕи эрэннэрэр БАСХАН» — Слепцов Климентий (Ньурба);
«Кэрэхсэбиллээх БАСХАН» — Матвеев Арчын (Дьокуускай);
«Тобуллаҕас толкуй БАСХАНА» — Семенов Кэскил (Бүлүү);
«Кыайыыга дьулуурдаах БАСХАН» — Дорофеев Мирослав (Ньурба);
«Киэҥ көрүүлээх БАСХАН» — Горохов Айаан (Сунтаар);
«Кэскиллээх кыттааччы» — Руфов Юлиан (Үөһээ Бүлүү).
Үөрүүлээх эҕэрдэ! Бары кыайыылаахтарбытыгар уонна кыттааччыларбытыгар барҕа махталбытын тиэрдэбит! Эһиги — Сахабыт сирин кэлэр кэскилэ, дьиҥнээх эр бэртэрэ буолаҕыт. «БАСХАН» оонньуу алгыстаах суола салҕана турдун, саха саарыннара үүнэн-тахсан, дойдубут сайдыытыгар үтүө үлэлэрин уурдуннар!
VI төгүлүн ыытыллыбыт өрөспүүбүлүкэтээҕи «БАСХАН – 2026» дьыалабыай оонньуу үрдүк таһымнаахтык түмүктэннэ. Бу улахан түһүлгэ Исидор Никифорович Барахов төрөөбүт Харбалаах нэһилиэгиттэн 2013 сыллаахха саҕаламмыта, бүгүн өрөспүүбүлүкэ таһымнаах уол оҕо иитиитин сүрүн бырайыагыгар кубулуйда.
Анал бириистэри олохтоон, кыттааччылары өйөөбүт дьоһун дьоммутугар махталбыт улахан. Бу күрэххэ анал бириистэри Харбалаах нэһилиэгин оҕотуттан оҕонньоругар диэри туох баар ытык-мааны олохтоохторо, тэрилтэлэр салайааччылара, уол оҕо иитиитин кэскиллээх бырайыагын өйөөбүт Үөһээ Бүлүү улууһун дьаһалтатыгар барҕа махталбытын тиэрдэбит.
Ол курдук, «БАСХАН» тэрээһинин хамыыһыйатын бэрэссэдээтэлэ, улуус баһылыгын социальнай боппуруостарга уонна дьиэ кэргэн политикатыгар солбуйааччы Анна Михайловна Уларова уонна улуус баһылыгын бастакы солбуйааччыта Егор Дмитриевич Иванов бырайыакпыт сүрүн бирииһин — ноутбугу — туруоран, саҥа саарыннарбытын үрдүктүк наҕараадалаатылар.
Эһиги болҕомтоҕут — ыччаттарбытын кэскиллээх олоххо түстүүр, кинилэри үтүөҕэ-кэрэҕэ сирдиир улахан тирэх буолар. Үтүө дьыалаҕа кылааттарын киллэрсибит тэрилтэ салайааччыларыгар туспа махтал!
Тэрийэр бөлөх: «Басхан» бырайыак — уол оҕону иитэр-үөрэтэр үлэҕэ сэмэй кылаатын киллэрэр дьон-сэргэ баар буолан, сыл аайы сайдан иһэр.
Харбалаах нэһилиэгин олохтоохторугар, улуус дьаһалтатыгар уонна үөрэх тэрилтэлэлэрин салайааччыларыгар уол оҕо кэскилин туһугар биир санаанан түмүллэн үлэлииргитигэр барҕа махталбытын тиэрдэбит! – диэн барҕа махталын тиэрдэр.
Сахабыт сирин ыччаттарыгар дириҥ суолтаны ылан ыытыллар «БАСХАН» түһүлгэтэ инникитин даҕаны дьону түмэ турдун. Элбэх көлүөнэ ыччаты сырдыкка суолдьут сулустуу сирдиир киэҥ түһүлгэбит аата ыраахха диэри дуорайдын!
Барыгытыгар барҕа махтал, ситиһиини уонна чэгиэн доруобуйаны баҕарабыт!
Галина Васильева
Сообщение «БАСХАН – 2026»: Саха сирин саҥа саарыннара билиннилэр появились сначала на Улус Медиа.