«Чолбон» сурунаал төрүттэммитэ 100 сылын көрсө, Семён Винокуров салайааччылаах «Полярные авиалинии» хампаанньа өйөбүлүнэн «Хотугу улуустарга айар экспедиция» диэн бырайыак саҕаланна. Бырайыак бастакы түһүмэҕинэн, бас эрэдээктэр Гаврил Андросов, уочарка уонна публицистика салаатын эрэдээктэрэ Утум Захаров муус устар 10-14 күннэригэр Дьааҥы улууһугар үлэлээтилэр.
Сурунаал үлэһиттэрэ түөрт хонук устата Арыылаах, Дулҕалаах, Элгэс нэһилиэктэригэр, Верхоянскай куоратыгар уонна Баатаҕай бөһүөлэгэр дьону-сэргэни, айар куттаахтары, кыраайы үөрэтээччилэри кытары көрүстүлэр. Маны сэргэ номоххо киирбит Киһилээх хайатыгар, музейдарга ол иһигэр «Тымныы полюһугар», үлэ, үөрэх тэрилтэлэригэр ыалдьыттаатылар. Дьааҥы сиригэр аан бастакытын «Чолбон өйүн күрэһэ» оонньуу Баатаҕай бөһүөлэгэр ыытыллан аҕыс хамаанданы түмтэ. Түмүккэ үөрэх салаатын «Маарыйалар» хамаандата кыайда. «Хотугу сулус. Баатаҕай орто оскуолата» 2-с, «Ветеран севера» 3-с, «Хотугу сулус-39» 4-с миэстэлэри ыллылар.
Дулҕалаах нэһилиэгин баһылыга Елена Ноговицына: «Тапталлаах “Чолбон” сурунаалбыт үбүлүөйдээх төгүрүк 100 сылынан биһиги нэһилиэкпит аатыттан истиҥ эҕэрдэ буолуохтун! Сахабыт тылын, историятын, культуратын барҕардар мааны сурунаалбыт үбүлүөйдээх дьылынан, биһиги Дулҕалаах нэһилиэгин олохтоохторо, Дьааҥыбыт улууһун үрдүнэн сурутууну 100 ахсааҥҥа тиэрдиэҕиҥ диэн ыҥырыы таһаарабыт», – диэн тыл көтөхтө. Елена Михайловна этиитин улуус дьаһалтата, культура уонна духуобунай сайдыы салаата сөбүлээн, өйөөн бу хамсааһын Дьааҥы үрдүнэн тилийэ көтөн, үс хонук иһигэр түөрт уонтан тахса киһи суруттара оҕуста. Онон Дьааҥы улууһа сурунаал доҕотторун кэккэтигэр киирэн, сурутууларын ахсаанын элбэтэргэ соруммуттара биһиэхэ күндү кэһии, мааны бэлэх буолла.
Айан түмүгүнэн сурунаалга Дьааҥы туһунан ыстатыйа уонна олохтоох ааптардар айымньылара бэчээттэниэхтэрэ, улуус дьаһалтата уонна сурунаал эрэдээксийэтэ литература, история, үйэтитии хайысхатыгар бииргэ үлэлиэхтэрэ.
«Чолбон» сурунаал эрэдээксийэтэ «Полярные авиалинии» хампаанньа генеральнай дириэктэригэр Семён Винокуровка, Дьааҥы улууһун баһылыгын эбээһинэһин толорооччу Федор Ивановка, улуус сэбиэтин бэрэссэдээтэлэ Екатерина Ноговицынаҕа, культура уонна духуобунай сайдыы салаатыгар (салайааччы Эрэл Стручков), улуус киин библиотекатыгар (салайааччы Марта Горохова), Владислав Кривошапкиҥҥа, Василий Колесовка, суоппар Егор Потаповка уонна нэһилиэктэр салайааччыларыгар барҕа махталын биллэрэр.
«Хотугу улуустарга айар экспедиция» салгыы Орто Халыма улууһугар айанныаҕа.
«Чолбон» сурунаал
Сообщение Дьааҥы улууhа 100 «Чолбону» суруттарыа появились сначала на Улус Медиа.