Саха сирин өрүстэригэр сааскы уу халааныттан сэрэтэр уонна көмүскэнэр дьаһаллар үгэннээн ыытылла тураллар. Сорох сиргэ, бэлиэр, үлэ түмүктэннэ.
Росводресурс Өлүөнэ сүнньүнээҕи уу салалтатыттан иһитиннэрэллэринэн, бу дьыл муус устар 14 күнүнээҕи туругунан, бэдэрээттэспит тэрилтэлэр былааннаммыт кээмэйтэн 573,8 гектар иэннээх мууһу хараартылар (66,81 бырыһыана) уонна 36 килэмиэтир усталаах мууһу эрбээтилэр (87,8 бырыһыана).
Ол курдук, отчуоттанар кэмҥэ Өлүөнэ өрүскэ сүрүн учаастактарга – Ленскэй уонна Өлүөхүмэ улуустарыгар, Халыма өрүскэ Үөһээ Халыма улууһугар, Бүлүү өрүскэ Ньурба улууһугар, Алдан өрүскэ Алдан, Уус Маайа, Томпо уонна Таатта улуустарыгар, Амма өрүскэ Алдан, Амма улуустарыгар итиэннэ Нүүйэҕэ Ленскэй улууһугар баар учаастактарга былааннаммыт үлэ толоруллубут.
Өрөспүүбүлүкэ 13 улууһун уонна “Дьокуускай куорат” куораттааҕы уокуругу хабан, харыы тахсар куттала сабаҕаланар 92 учаастактан 85-гэр 858,8 гектар иэҥҥэ хараардыы уонна 7-гэр 41 килэмиэтир уһуҥҥа мууһу эрбэтии үлэлэлэрэ ыытыллаларыгар федеральнай бүддьүөттэн 75,054 мөл. солкуобай кээмэйдээх субвенция тыырыллан турар. Бу үптэн 58,009 мөлүйүөнэ Өлүөнэ, Бүлүү, Халыма, 17,045 мөлүйүөнэ Алдан, Амма, Нүүйэ, Токко өрүстэргэ сааскы уу халаанын хоромньута, сүтүгэ суох аһарар сыалла туттуллар.
Василий Никифоров
Сообщение Саха сиригэр сааскы халаантан сэрэтэр үлэ үксэ оҥоһулунна появились сначала на Улус Медиа.