Дьокуускай – Аллараа Бэстээх хайысханан Саха сирин Өлүөнэ өрүһүнэн массыына сырыыта сабыллыбытынан сибээстээн, сарсыҥҥыттан, муус устар 16 күнүттэн, салгын сыттыктаах суудуналар тахсыахтара диэн СӨ Тырааныспарын министиэристибэтэ иһитиннэрэр.
Быыһык кэмҥэ бастакы түһүмэххэ пассажирдары тиэйиини «ЛенаТранс»ХЭО ыытыаҕа. Хампаанньа «А8» (Хивус-10) салгын сыттыктаах 8 суудунаны үлэлэтиэ. Айан Дьокуускай куорат 204-с түөлбэтиттэн («Намыв» ыстаансыйа) Мэҥэ Хаҥалас улууһун Аллараа Бэстээҕэр диэри илдьиэҕэ.
Онтон Павловскай – Хатас мууһунан айан сырыыта сабыллыбытын кэннэ, быһа холоон муус устар 18-19 күннэригэр, дьону таһыыга сүрүн операторынан – «Ленаводсервис» ХЭО буолуоҕа. Быыһык кэмҥэ суудуна уопсай ахсаана 30-ҕа тиийиэҕэ.
Дьону таһыы халлаан сырдыгар – 07:00-тэн 19:00 диэри ыытыллыаҕа. Айан сырыытын кыраапыга суудуналар хайдах туолалларынан оҥоһуллуоҕа. Сааскы кэмҥэ салгын сыттыктаах суудунанан дьону таһыы сыаната ааспыт сыл таһымынан хаалар уонна биир пассажирга 2500 солк. буолуо.
Санатан суруйдахха, дьон айанныырыгар табыгастаах буоллун диэн, ааспыт сыл алтынньытыгар Дьокуускай 204-с түөлбэтин территориятыгар «Намыв» ыстаансыйа үлэҕэ киирбитэ. Эбийиэк суолунан-ииһинэн уонна наадалаах инфраструктуранан хааччыллан турар.
Муус хойуутук барар кэмигэр салгын сыттыктаах суудуналар сырыылара быстах кэмҥэ тохтуо, оччоҕо солбук авиарейстэр оҥоһуллуохтара. «Полярные авиалинии» авиахампаанньа Ми-8 бөртөлүөтү Маҕан – Павловскай – Маҕан хайысханан наада буоллаҕына көтүтэргэ бэлэм.
Бөртөлүөтүнэн таһыы сыаната биир пассажирга 7000 солк. буолуоҕа. 2-тэн 12-гэр диэри саастаах оҕолорго билиэт сыанатыттан 50% чэпчэтии көрүллүө. Авиабилиэттэри Маҕан аэропордугар «Полярные авиалинии» АК каассаларыгар уонна «Павловскай» бөртөлүөт түһэр былаһааккатыгар атыылыахтара.
СӨ тырааныспарга министиэристибэтэ өрөспүүбүлүкэ олохтоохторун уонна ыалдьыттарын быыһык кэмҥэ быһыыны-майгыны өйдөөн, суһал эрэ наадаҕа айанныыры былаанныырга ыҥырар.