Бүгүн, муус устар 15 күнүгэр, «ВОИН» киин Саха сиринээҕи филиала икки сыллаах үлэтин түмүгүн бэлиэтиир үөрүүлээх тэрээһинэ буолан ааста. Бу икки сыл устата киин Уһук Илин эрэгийиэнигэр ыччаты байыаннай-спортивнай бэлэмэнээһиҥҥэ уонна патриотическай иитиигэ сүрүн тирэх баазатыгар кубулуйда.
Бу күн «ВОИН» киин ыкса бииргэ үлэлэһэр партнердара кэлэн эҕэрдэлээтилэр, сэмэй бэлэхтэрин туттардылар. Онтон киин кэллэктиибэ бииргэ үлэлэһэр тэрилтэлэригэр махтал суруктары туттардылар.
Бүгүн киин икки сылын бэлиэтиир тэрээһиҥҥэ «ВОИН» киин Саха сиринээҕи филиалын салайааччыта, норуот дьокутаата, «БАРС-2» штурмовой батальон хамандыыра, «Эр санаа» уордьан кавалера Василий Егоров тыһыынчанан курсаан үөрэнэн ааспытын бэлиэтээн эттэ уонна үлэһиттэргэ махталын биллэрдэ.
«Эһиги наада буоллаҕына, түүннэри-күнүстэри үлэлиигит. Куруук инники хардыыны оҥороҕут уонна үлэҕитин сүүс бырыһыан оҥороҕут. Биһиги кииммит соруга – саҥа көлүөнэ патриоттарын, төрөөбүт дойдубутун көмүскүөхтээх дьиҥнээх патриоттары бэлэмниэхтээхпит. Бу 2 сыл иһигэр биһиги инструктордарбыт, үлэһиттэрбит 4056 курсааны бэлэмнээтилэр. Курсааннарбыт, биһигини түһэн биэриэххит суоҕа диэн эрэнэбит, тоҕо диэтэххэ, эһигини кытта анал байыаннай дьайыыга сылдьыбыт дьиҥнээх инструктордар үлэлээбиттэрэ, бэйэлэрин холобурдарынан эһигини такайбыттара. Мин бүгүн партнердарбытыгар, бииргэ үлэлэһэр тэрилтэлэрбитигэр, дьоммутугар махтаныахпын баҕарабын. Манна биир киһи үлэлээбэт, бүтүн хамаанда үлэлиир, онон бу барыта биһиги кыайыыбыт», — диэн Василий Егоров махталын тиэртэ.
“Патриот” ыччат киинин салайааччыта Сулустаан Заболоцкай киин уонна Саха сиринээҕи анал байыаннай дьайыы бэтэрээннэрин ассоциациятын аатыттан эҕэрдэ тылын эттэ:
“ВОИН” киин икки сылынан эҕэрдэлиибин. Бастатан туран, эйэлээх олоҕу, ыраас халлааны баҕарабын. 2 сыл диэн олус кыра кэм, ол эрээри олус элбэх үлэ оҥоһулунна. Бастакы сылгытыгар курсааннары сөптөөхтүк дьарыктаан, федеральнай таһымнаах байыаннай күрэхтэһиигэ биһиги хамаандабыт бастакы миэстэни ылары ситиспитэ. Бу кыайыы ыараханнык кэлбитэ, элбэх киһи сыратын ууран бэлэмнээн, эрчиллиини ааһан. Онон эһиги кэллэктиипкэ ситиһиилээх үлэни баҕарабын. Бары олус үчүгэй үлэһит, патриот дьон, бу олорор ыччаттар эмиэ оннук буолуохтара диэн эрэнэбин. Оҕолор, кинилэргэ тэҥнэһиҥ уонна төрөөбүт дойдугутун таптааҥ уонна патриот буолуҥ”, — диэн эттэ Сулустан Заболоцкай.
«ВОИН» киин 2024 сыл муус устар 15 күнүгэр Арассыыйаҕа биир бастакынан аһыллыбыта. Киин Арассыыйа Бэрэсидьиэнэ Владимир Путин дьаһалынан, Юрий Трутнев уонна Ил Дархан Айсен Николаев өйөбүллэринэн тэриллибитэ. Сүрүн соруга – дойдуну көмүскүүр кыахтаах, күүстээх санаалаах, бэриниилээх, эппиэтинэстээх эдэр ыччаты бэлэмнээһин буолар.
Икки сыл иһигэр филиал 4056 курсааны бэлэмнээтэ. 2025 сыллаахха эрэ 2 тыһыынчаттан тахса киһи үөрэммит, онтон 700-тэн тахса оҕо «Время юных героев» сайыҥҥы симиэнэҕэ кыттыбыт.
Киин сүрүн баайа – инструктордар. Бүгүн 20 уопуттаах настаабынньык үлэлиир, онтон 17-тэ анал байыаннай дьайыы кыттыылаахтара. Кинилэр ортолоругар дьоруойдуу быһыыларын иһин судаарыстыбаннай наҕараадаламмыт «Боотур» этэрээтин доброволеһа, «За отвагу» мэтээллээх Александр Соров баар. Билигин кини бэйэтин уопутун ыччакка биэрэр, тактическай мэдиссиинэҕэ уонна патриотизмҥа үөрэтэр.
2025 сыл саамай бэлиэ түгэнинэн – «Боотур» хамаанда «Путь ВОИНа» бүтүн Арассыыйатааҕы байыаннай-тактическай күрэххэ бастакы миэстэни ылбыта буолар. Ил Дархан Айсен Николаев бэлиэтээбитинэн, бу – күүстээх эрчиллии, дьулуур уонна хамаанда биир санаалаах буолуутунан ситиһиллибитэ.
Бүгүн курсааннар: тактическай уонна инженернэй бэлэмнэниини аастылар, саанан ытыыга, БПЛА-ны салайыыга, мэдиссиинэ бастакы көмөтүн оҥорууга үөрэннилэр.
«ВОИН» киин – биир хамаанда, биир дьиэ кэргэн. Бүтүн дойду өйөбүллээх кэллэктиибэ, курсааннара уонна иитээччилэрэ инникитин даҕаны дойдубут чиэһин көмүскүүргэ бэлэмнэр.
