Бүгүн Дьокуускайга анал байыаннай дьайыыга сылдьан өлбүт «Кречет» позывнойдаах байыас – Андрей Георгиевич Исаков сырдык аатыгар анаммыт буулдьанан ытыыга III-с өрөспүүбүлүкэтээҕи аһаҕас турнир аһылынна.
Турнир Дьокуускай куорат 2 №-дээх политехническай оскуолатыгар ыытыллар. Күрэхтэһии аһыллыытыгар Андрей Исаков чугас дьоно, оскуола оҕолоро уонна анал байыаннай дьайыы бэтэрээннэрэ кытыннылар. Тыл эппит дьон тэрээһин аҥаардас успуорт эрэ буолбакка, Аҕа дойдуну көмүскээччилэргэ ытыктабыл буоларын тоһоҕолоон бэлиэтээтилэр.
«Патриот» ыччат киинин дириэктэрэ, анал байыаннай дьайыы бэтэрээннэрин Саха сиринээҕи ассоциациятын бэрэссэдээтэлэ Сулустан Заболоцкай турнир үһүс төгүлүн ыытылларын уонна өрөспүүбүлүкэтээҕи таһымнааҕын бэлиэтээтэ: «Дьокуускай куораттан уонна чугастааҕы Тулагы сэлиэнньэтиттэн, Нам, Хаҥалас улуустарыттан уопсайа 60-тан тахса үөрэнээччи кэлэн кытта сылдьар. Былырыын Дьокуускайга 2 №-дээх политехническай оскуолаҕа Андрей Исаков аатынан «Төрөөбүт дойду куттала суох буолуутун уонна көмүскэлин төрүттэрэ» (ОЗИР) кэбиниэт аһыллыбыта. Быйыл кини тус малларын – байыаннай таҥаһын, биноклын, планшетын, дастабырыанньатын уо.д.а. быыстапката көрдөрүүгэ турда. Оҕолор да, ыалдьыттар да олус интэриэһиргээн көрдүлэр. Мин Андрей ийэтигэр, быраатыгар, үөрэммит оскуолатын кэллэктиибигэр, оскуола дириэктэрэ Василий Михайловичка, кылаабынай судьуйа Геннадий Юрьевичка махтаныахпын баҕарабын. Андрейы кытта бииргэ сулууспалаабыт уолаттар, доҕотторо, атын кинини билбэт да дьон кэлэн өйөөтүлэр. Кинини кытта наркоконтрольга үлэлээбит уолаттар, бииргэ үөрэнэр оҕолоро, чугас дьонноро бириистэри олохтоотулар. Бириистэрэ да олус үчүгэй. Турнир сыл аайы сайдан, кэҥээн иһэр, аны өрөспүүбүлүкэтээҕи таһымнанна. Маннык сылтан-сыл кэҥиэ, сайдыа диэн эрэнэбит».
Дьокуускай куорат 29-с №-дээх оскуолатын үөрэнээччитэ Айысхан Семенов эмиэ турнирга кытта сылдьар. Кини буулдьанан ытыы үөрүйэхтэрин дэриэбинэҕэ бултааһыҥҥа ылбытын кэпсээтэ: «Буулдьанан ытыынан мин оннук күүскэ дьарыктаммаппын. Көннөрү дэриэбинэҕэ бултааччыбын, онно ытарга үөрэммитим. Манна кыттаарыбыт оскуолаҕа кыратык эрчиллибиппит. Буулдьанан ытыы турнирыгар аан бастакыбын кыттабын. Бастаан ытарбар кыратык долгуйбутум, онтон барыта ааспыта. Син табыллан ыттым дии саныыбын. Сэттэ уонна аҕыс икки ардынан ытыалаатым. Түмүк бакаа биллибэт, кыаҕым тиийэринэн кытынным. Кэлэр турнирдарга өссө үчүгэйдик ытыам диэн эрэнэбин».
Дьокуускай куорат 12-с №-дээх оскуолатын буулдьанан ытыыга хамаандатын тириэньэрэ Людмила Странден турнир туһунан санаатын маннык үллэһиннэ: «Быйыл балаҕан ыйыттан эрэ буулдьанан ытыынан дьарыктанан эрэбит. Күрэхтэһиигэ түөрт оҕону аҕалбытым. Мин буулдьанан ытыы федерациятыгар дьарыктанабын – бу мин иллэҥ кэммэр дьарыгым буолар, бэйэм туспа үлэлээхпин. Бу күһүҥҥүттэн 12-с №-дээх оскуолаҕа оҕолору эрчийэбин. Маннык күрэхтэһиигэ аан бастаан кыттабыт, оҕолорбут олус долгуйаллар. Мин кэтээн көрүүбүнэн, саҥа саҕалааччылар да буоллар, балачча үчүгэйдик ыталлар. Эрчиллиигэ үрдүкү кылаастартан баҕалаах оҕолор бары сылдьаллар, оттон күрэхтэһиигэ кыттарга бу оҕолор ортолоругар сүүмэрдээһини ыыппыппыт. Федерацияҕа тиийэн разрядтары толорбуппут, онно үс оҕом 3-с разряды ылбытта. Оҕолор үөрэллэр, сөҕөллөр, кыайыыга дьулуһаллар. Оҕолорго бу күрэхтэһии, бастатан туран, успуорка кыттыыга уопут буолар уонна дьиссипилиинэни тутарга, патриотическай иитиигэ олук буолар. Инникитин маннык күрэхтэһиилэргэ мэлдьи кыттарга кыһаллыахпыт».
