Алтынньы 31 күнэ үүнэр түүнүгэр, 2 чаас 44 мүнүүтэҕэ РФ ИДьМ Ленскэй улууһунааҕы салаатын дьуһуурунай чааһыгар Витим бөһүөлэгэр массыына саахала буолбутун туһунан иһитиннэрии киирбит.
Барыллаан быһаарыынан, 2 чаас 40 мүнүүтэҕэ Ленин уулуссатын 8-с нүөмэрдээх дьиэтин таһыгар «Toyota Corolla» массыына суоппара уруулун кыайан туппакка, суолтан туораан тахсан, массыыната түҥнэстибит.
Саахал түмүгэр 1996 сыллаах төрүөх дьахтар миэстэтигэр, суһал көмө кэлиэр диэри тыына быстыбыт, оттон 1995 сыллаах төрүөх суоппар ылбыт эчэйиилэриттэн балыыһаҕа киирэн өлбүт.
Массыына саахалын чахчытынан бэрэбиэркэ ыытыллар, быһылаан туохтан тахсыбытын быһаараллар.