Үлэһит быраабын кэһии, үлэ чааһыттан таһынан хаалларан үлэлэтии – ханнык баҕарар эйгэҕэ баар көстүү. Хаһыат ааҕааччыларыттан маннык сыһыаннаах ыйытыылар мэлдьи киирэллэр. Бүгүн биир оннук ыйытыыга хоруйдуубут.
Биһиги тэрилтэбитигэр күн аайы үлэ чааһын таһынан 2-3 чаас эбии үлэлэтэллэр (үлэлииргэ күһэйэллэр). Бу эбии үлэлээбит чаастарбытыгар сокуонунан туспа (үрдэтиллибит) төлөбүр көрүллэр дуо?
Арассыыйатааҕы Көҥүл идэлээх сойуустар федерацияларын аппараатын быраапка департамена быһаарбытын СӨ Идэлээх сойуустарын федерациятын саайта суруйар:
– Бу түгэҥҥэ үлэһити нуорманы таһынан үлэҕэ тардыы тахсыбыта көстөр. (Манна сокуонунан олохтоммут муҥутуур нуормалары кэһии уонна төрүөтэ суох эбии үлэлэтии бэлиэлэрэ эмиэ баар буолуон сөп).
РФ Үлэҕэ кодексатыгар олоҕуран, нуорманы таһынан үлэлээбит бастакы икки чаас иһин төлөбүр 1,5 кээмэйтэн кырата суох, оттон салгыы үлэлээбит чаастарга – 2 төгүл үрдэтиллибит кээмэйинэн төлөнүөхтээх.
Эбии үлэлээбит чаас иһин чуолкай төлөбүр кээмэйэ тэрилтэ кэлэктиибин дуогабарыгар, ис нуормалыыр аахталарыгар эбэтэр үлэһити кытта түһэрсиллибит үлэ дуогабарыгар суруллуохтаах.
Маны таһынан, үлэһит бэйэтэ баҕардаҕына, ити нуорманы таһынан үлэлээбит чааһын үрдэтиллибит харчынан буолбакка, эбии сынньанар бириэмэнэн (отгул) ылыан сөп. Ол эрээри, ити эбии бэриллэр сынньанар бириэмэтин уһуна кини нуорманы таһынан үлэлээбит чааһыттан кыра буолуо суохтаах.
Бэйэҕит быраапкытын билиҥ уонна сокуоннай ирдэбиллэри тутуһалларын модьуйуҥ!