Кыстык хонуга бүтэрэ лоп курдук 40 күн хаалла. Тыа хаһаайыстыбатын уонна ас-үөл бэлиитикэтин министиэрибэтигэр хас чэппиэр ахсын улуустартан түмүллэр сыыппараларынан сирдэттэххэ, муус устар 16 күнүнээҕи туругунан, улуустар бары быйылгы кыстыгы этэҥҥэ түмүктүөхтэрэ.
Ол курдук, сүөһү-сылгы аһылыгар суоттаммыт от 28,9 бырыһыана (124,3 тыһ. туонна), ынах сүөһү сүмэһиннээх аһылыгар сиилэс 31,9 (9,7 тыһ. туонна) уонна сенаж 19 (2,7 тыһ. туонна) бырыһыанныыта ордубуттар. Мантан саас күн-дьыл туран биэрдэҕинэ, хаһаайыстыбалар добуочча оту курулатар кыахтаахтар. Өрөспүүбүлүкэ орто көрдөрүүтүн куоһарар хаһаас оттоох улуус элбэх: кыстыкка киириигэ баартан Үөһээ Бүлүү 40, Өлүөхүмэ 37,42, Чурапчы 36,61, Нам 32,69, Хаҥалас 31,24, Мэҥэ Хаҥалас 30,65 бырыһы анныы отторо ордубут. Бу кэккэҕэ тастан атыылаһан, тиэйтэрэн салҕаммыт Мииринэйи кытта хотугу улуустары киллэрбэтим.
Отчуоттанар кэмҥэ 41 739 сылгы, бүттүүн төбөттөн 25,1 бырыһыана, эбии аһылыкка турар. Былырыын баччаҕа сылгы 34 бырыһыана (58 912 төбө) эбии аһатыллара. Баар сылгыларыттан саамай элбэх төбөнү Сунтаар (8 992 төбө / 94,5 бырыһыана), Үөһээ Бүлүү (6 269 / 83,5%), Куорунай (3 990 / 81,2%), Ньурба (6 588 / 66,1%), Бүлүү (3 464 / 48,7%), Өлүөхүмэ (2 338 / 42,5%), Ленскэй (528 / 40,6%) улуустарыгар аһаталлар. Көстөрүн курдук, арҕаа эҥээргэ ардаан баран тоҥорбута сабыдыаллаата.
Кыстык устатыгар 341 ынах сүөһү уонна 138 сылгы көнньүнэн охтубуттар. Ити иһигэр сүөһү туһата өлүүтүн элбэх түбэлтэтэ Куорунай (94), Бүлүү (79), Сунтаар (37), Нам (29), Амма (21) улуустарыгар таһаарыллыбыт. Куорунайга 55, Ньурбаҕа 16, Аммаҕа 14, Бүлүүгэ 13 сыспай сиэллээхтэриттэн ытыс соттубуттар.
Бу кэмҥэ сүөһү иитэр бары киэптээх хаһаайыстыбаларга төрүөх үгэнэ. Отчуоттан көстөрүнэн, уулаах ынахтан 37,5 бырыһыана төрөөн, 24 021 ньирэйи ылбыттар. Былырыын баччаҕа ынах 40,1 бырыһыана төрөөбүтэ. Онон төрүөх бытаарбытын ааһан, ынах ахсаана 3,4 %-нан көҕүрээбитин суотугар ааспыт саастааҕар 9,7 %-нан аҕыйах ньирэй төрөөтө. Биэ төрүөҕэ эмиэ, дьыл уһуурун биттэнэн эбитэ дуу, бытаарда: былырыын баччаҕа төрүөх биэриэхтээх биэттэн 2,3 бырыһыаннара кулуннаммыт эбит буоллахтарына, быйыл саас муус устар 16 күнүнээҕи дааннайынан – 2 бырыһыаннара төрөөтө.
Василий Никифоров
Сообщение Сүөһү-сылгы кыстыгы холкутук туоруур аһылыктаах. Арай, төрүөхтэрэ бытаарда появились сначала на Улус Медиа.