Бу күннэргэ «Хаҥалас-Ас» тыа хаһаайыстыбатын производственнай кээпэрэтиибин Мохсоҕоллоохтооҕу үүтү астыыр сыаҕыгар улахан өрөмүөн үлэтэ түмүктэннэ. Салайааччы Сергей Латышев иһитиннэрбитинэн, тэрилтэ оҥорон таһаарар бородууксуйатын элбэтэр, атыыга хамаҕатык батарар туһуттан оҥорон таһаарыы саҥа ньыматын боруобалаан саҕалаата. Бу күннэргэ сыахха саҥа тэриллэри аҕалан таҥан туруордулар, диэн «Хаҥалас» хаһыат суруйар.
— Биһиги үүттэн уһуннук харайыллар болдьохтоох бородууксуйаны оҥорон таһаарарга анаан термостат-заквасочник, сүөгэй, йогурт кутар дозатор, бэлэм бородууксуйаны тиэйэн атыылыырга рефрижератор-фургон уонна молоковоз ылынныбыт. Саҥа тэрилбитин боруобалаан, үөрэтэн баран инникитин сүөгэй, суорат, кефир, бифацил, йогурт оҥорууга болҕомтобутун туһаайыахпыт. Тэрилтэбит Төхтүртэн Булгунньахтаахха диэри итиэннэ Тойон Арыы, Кыһыл Үрүйэ, Хачыкаат сэлиэнньэлэри хабан үүт тутар, арыы оҥоһулла турар. Ону сэргэ, Үөдэйгэ нэһилиэнньэттэн күөх луугу туттубут, — диэтэ Сергей Петрович.
“Баар кыһалҕаны быһаарарга көрдөстүбүт”
Салайааччы өссө биир сонуна – соторутааҕыта Саха сиригэр Россиятааҕы «Народный фермер» тыа хаһаайыстыбатын табаарын оҥорон таһаарааччылар Ассоциацияларын толорооччу дириэктэрэ Станислав Санкеев кэлэ сылдьыбыта буолар. Санатан эттэххэ, дойдуга ас-үөл өттүнэн куттал суох буолуутун хааччыйыы чэрчитинэн, дойду президенэ Владимир Путин өйөбүлүнэн, тыа хаһаайыстыбатын табаарын оҥорооччуларын түмэр «Норуот фермерэ» ассоциация 2021 сылтан тэриллэн үлэлиир. Бу ассоциация дойду 72 эрэгийиэнин тыа хаһаайыстыбатын табаарын оҥорооччулары түмэр. Быйыл саас бу хамсааһыҥҥа биһиги өрөспүүбүлүкэбит холбоһон, «Норуот фермерин» эрэгийиэннээҕи ассоциацията тэриллибитэ.
— Станислав Санкеев бу сырыытыгар эрэгийиэннээҕи ассоциация салалтатын уонна ассоциация чилиэннэрин, эдэр фермердэри кытары көрсөн, ыытыллар үлэни-хамнаһы билистэ, Ил Түмэҥҥэ, Тыа хаһаайыстыбатын уонна ас-үөл бэлиитикэтин министиэристибэтигэр көрсүһүү тэрилиннэ, Хаҥалас улууһун хаһаайыстыбаларыгар сырытта. Ил Түмэҥҥэ буолбут көрсүһүүгэ тус бэйэм көҕүлээһимминэн дойду таһымыгар, үрдүкү салалтаҕа быһаарыллыахтаах кэккэ боппуруостары, тыа хаһаайыстыбатынан дьарыктанааччылар, олохтоох аһы-үөлү оҥорон таһаарааччылар көрсөр кыһалҕаларын ыйан туран сурук бэлэмнээн Станислав Анатольевичка туттардыбыт. Онно, бастатан туран, Саха сиригэр өртөөһүн от үүнүүтүн таһымын үрдэтиигэ туһатын ыйдыбыт уонна биһиэхэсааскы өртөөһүнү ыытыыга хонтуруолу эрэгийиэҥҥэ сүктэрэллэрэ буоллар диэн көрдөстүбүт. Иккиһинэн, биллэрин курдук, биһиги өрөспүүбүлүкэбитигэр оҥоһуллан тахсар бородууксуйа эрэгийиэммит иһигэр эрэ атыыланар, Саха сирин тас өттүгэр экспортаммат. Онон кэтээн көрөр систиэмэлэри (ФГИС) киллэрии уонна «Честный знак» булгуччулаах маркировкалааһын биһиги табаары оҥорооччуларбытыгар эбии ноҕоруусканы үөскэтэр. Аччыгый уонна орто хаһаайыстыбалар оборудованиены уонна программанан хааччыйыыны атыылаһыыга улаханнык ороскуотураллар, систиэмэлэри кытта үлэлииргэ эбии персонал наада эбэтэр үлэһиттэри эбии үөрэттэрии ирдэнэр. Аны туран, отчуоттааһына ыарахан, цифровой систиэмэҕэ үлэлииргэ, ордук бастакы түһүмэххэ, сыыһа-алҕас таҕыстаҕына ыстарааптанар куттал баар. Бу биһиги курдук маркировкаламмыт табаардарын экспортка таһаарбат эрэгийиэннэргэ булгуччулаах маркировканы көтүрэр туһунан боппуруоһу Россия бырабыыталыстыбатыгар көҕүлүүргэ көрдөстүбүтуонна федеральнай маркировканы туттубакка эрэгийиэннээҕи информационнай систиэмэлэр чэрчилэринэн маннык бородууксуйаны учуоттааһын судургутутуллубут бэрээдэгин көрөргө этии киллэрдибит, — диэн Сергей Латышев кэпсээтэ.
«Народный фермер» Ассоциация салайааччыта Станислав Санкеев Хаҥалас улууһугар Күөрдэмҥэ сылдьан «Хаҥалас-Агрохолдинг» ТХПК, Бырааттыы Николаевтар ааттарынан 2-с Дьөппөн орто оскуолатыгар «Кадры в АПК» федеральнай бырайыак иитинэн өрөспүүбүлүкэҕэ бастакынан арыллыбыт агрокласс үлэтин билистэ. Салгыы Санкеев Улахан Ааҥҥа «Бөртө» сылгы собуота» ХЭТ сайылыгар ыалдьыттаата, манна зоотехник Ульяна Семенова тыйыс тымныылаах Саха сиригэр ынах сүөһүнү иитии, дэлэтии туһунан кэпсээтэ диэн СӨ Тыа хаһаайыстыбатын министиэристибэтин пресс-сулууспата иһитиннэрдэ.
Ольга Гермогенова.
Хаартыскалар: Сергей Латышев тиксэрдэ уонна sakhaparliament.ru сайтан туһанылыннылар.
Сообщение «Хаҥалас-Ас» саҥа таһымҥа тахсар появились сначала на Улус Медиа.