Ыччат ортотугар Олоҥхону толорооччулар өрөспүүбүлүкэтээҕи күөн күрэстэригэр 22 биирдиилээн уонна 6 бөлөҕүнэн ааҕааччы кыттар. Эдэр олоҥхоһуттар 18-35 саастаахтар. Быйылгы күрэххэ бары кыттааччылар бэркэ бэлэмнэнэн, кыайардыы оҥостон кэлбиттэр.
Күрэх тэрийээччитэ Айаал Саввинов бэлиэтииринэн, кыттааччылар өрөспүүбүлүкэ араас муннуктарыттан, чуолаан киин оройуоннартан кэлбиттэр. Ол курдук, саамай элбэх толорооччу Олоҥхо Ыһыаҕа ыытылла турар сириттэн — Кэбээйиттэн, ону тэҥэ Горнайтан, Тааттаттан, Чурапчыттан муһунна.
«Олоҥхону толоруу кэнники сылларга олус сайынна, тоҕо диэтэр ыччат олоҥхону сэргиир буолла. Сылын ахсын биһиги да күрэхпитигэр кыттааччы ахсаана элбээн иһэр. Уопсайынан саха тылыгар, култууратыгар интэриэс үрдээтэ, ол биһигини наһаа үөрдэр. Олоҥхону, мин санаабар, оскуолаҕа аахтарыахха наада. Олоҥхону сэргээн ааҕар оҕо сахалыы ыраастык саҥарар буолар, тыл баайын баһылыыр», — диир Айаал Саввинов.
19 саастаах Кэбээйи улууһун Тыайатыттан сылдьар Света Полятинская олоҥхонон 4 кылаастан дьарыктанар. Билигин кини номнуо устудьуон, ол эрэн олоҥхотун бырахпакка, күрэстэргэ үөрэ-көтө кыттарын туһунан сэһэргээтэ:
«Олоҥхо күрэҕэр уруккуттан кыттабын. Бу куонкуруска Сергей Васильев «Күн Эрили» олоҥхотун толордум. Кыттааччылар бары ох курдук оҥостон кэлбиттэрэ биллэр. Бары күүскэ бэлэмнэнэн, кыайардыы-хотордуу тэриммиттэр, таһымнара үрдээбит».
Күрэх кыайыылаахтарын сарсын, от ыйын 5 күнүгэр, быһаарыахтара.
Сэргээн аах: Ысыах Олонхо в Кобяйском улусе открыл третье Десятилетие Олонхо
Сообщение Өрөспүүбүлүкэ бастыҥ эдэр толорооччулара Олоҥхо ыһыаҕар муһуннулар появились сначала на Улус Медиа.