«Хомус хомуһун дорҕоонноро» хомусчуттар күрэхтэригэр Саха сирин ыраах-чугас улуустарыттан 50-ча биирдиилээн, 10 бөлөҕүнэн уонна 8 оҕо кыттааччы кэлбит. Күрэх икки түһүмэҕинэн ыытыллар. Бүгүн кыттааччы уопсай ахсааныттан 15 бастыҥ хомусчуту талан, кинилэр истэригэр кыайыылаахтары быһаарыахтара.
Биирдиилээн кыттар хомусчуттар бэйэлэрин айымньыларын оонньоон иһитиннэрдилэр. Сахаайа Нохсорова Дьокуускай куораттан кэлбит. Кини хомус күрэҕэр төһө кыалларынан көтүппэккэ кытта сатыыр.
«Маннык күрэх сыл аайы ыытыллара олус үчүгэй. Эдэр дьон да буоллун, саастаах киһи, оҕо да буоллун, бары бэйэ-бэйэбитин истэн үөрэнэбит, уопутурабыт. Ону кытта хомус тыаһын истэн, абылаҥар ылларан, дьарыктаныан баҕарар киһи элбиэ этэ буоллаҕа», — диир кини.
Таатта улууһуттан «Күн Чөмчүүк» норуот ансаамбылын кыргыттара сэттиэ буолан кэлбиттэр. Быйылгы Олоҥхо Ыһыаҕар бастакытын бөлөх быһыытынан кытталлар.
«Хомус түһүлгэтигэр бу сырыыга бөлөҕүнэн оҥорбуттарыгар үөрдүбүт. Ол иннинэ үксүн биирдиилээн кыттааччыбыт. Манна кэлэрбитигэр ох курдук оҥостон кэллибит, таҥаспытыгар-саппытыгар тиийэ бэлэмнэннибит, онон түмүктэрбитин долгуйа күүтэбит», — диэн «Күн Чөмчүүк» салайааччыта Сахайаана Колодезникова үллэһиннэ.
Сэргээн аах: Өрөспүүбүлүкэ бастыҥ эдэр толорооччулара Олоҥхо ыһыаҕар муһуннулар
Сообщение «Олоҥхо Ыһыаҕа-2026»: хомусчуттар күрэхтэрин бастакы түһүмэҕэр 50-ча киһи уонна 10 бөлөх кытынна появились сначала на Улус Медиа.