Саха сирин уран тарбахтаахтара Олоҥхо Ыһыаҕар «Иис-уус дьарыга — үйэлэр кистэлэҥнэрэ» көрүүгэ түмүстүлэр. Үс күн устата кинилэр бастыҥ оҥоһуктарын быыстапкаҕа туруораннар дьон-сэргэ биһирэбилин ыллылар. Бүгүн талба талааннаахтар Улус.Медиаҕа бэйэлэрин дьарыктарын туһунан сэһэргээтилэр.
Бүлүү улууһуттан 19-с төгүлүн ыытыллар Олоҥхо Ыһыаҕар уопсайа 40-тан тахса буолан кэлбиттэр. Ону кытта норуот маастардара бастыҥ оҥоһуктарын ыытан дьон көрүүтүгэр билиһиннэрдилэр.
«Биһиги талааннаах маастардарбыт бу быыстапкаҕа кыбытык тигиинэн оҥоһуллубут паннолары, туос оҥоһуктары, кылтан, сиэлтэн оҥоһуллубут үлэлэри ыыппыттара. Атын улуустар эмиэ бэркэ бэлэмнэнэн, киһи кэрэхсиир кэрэ оҥоһуктарын аҕалбыттарын бэлиэтии көрдүм. Билигин маастардар иис-уус кистэлэҥнэрин эдэр көлүөнэҕэ арыйан, оҕолоругар-сиэннэригэр тиэрдэр, анал маастар-кылаас да ыытар буолбуттар, онтон биһиги олус үөрэбит, астынабыт», — диэн үллэһиннэ норуот маастара Анна Семенова.
Мэҥэ-Хаҥалас улууһун Дьаҥхаады нэһилиэгиттэн сылдьар норуот маастара Саргылаана Иванова кылынан 2008 сылтан дьарыктанар. Дьаҥхаады талба талааннаах ийэлэрэ, эбэлэрэ 2014 сыллаахха «Ситии» түмсүүнү тэрийэн, күн бүгүҥҥэ диэри айа-тута сылдьаллар.
«Соботунан аатырбыт Кэбээйи улууһугар кэлбит дьон быһыытынан биһиги быыстапкаҕа анаан-минээн куйуур оҥорон аҕаллыбыт. Куйуурбут кураанах буолбатын диэн, соболору оҥордубут. Маны таһынан, манна улууспут уран тарбахтаахтара куукулалары, паннолары ыыттылар. Оттон биһиги «Ситии» түмсүүбүтүгэр кылтан, сиэлтэн оҥоһук арааһын оҥоробут, сыл аайы саҥаттан саҥаны айабыт. Мин санаабар, кыл күүһэ киһини бэйэтигэр тардан ылар курдук», — диир Саргылаана Иванова.
Уус-Алдан Курбуһаҕыттан кэлбит Василий Тимофеев оҥоһуктара лааппылар быыстарыгар киһи хараҕар тута быраҕыллаллар. Кини кырыымпа маастара. Олоҥхо Ыһыаҕын быыстапкатыгар Василий бэйэтин иитиллээччилэрэ оҥорбут кырыымпаларын аҕалан туруорбут.
«Кырыымпа тыаһа кыл хаачыстыбатыттан, сылгы, атыыр, биэ киэнэ буоларыттан, саастарыттан олус тутулуктаах. Струнаҕа хас утах кыл туттуллара эмиэ туспа уратылаах, ол иһин биһиги анал стенда оҥорбуппут. Сыһыарыы көрдөрүүтүнэн кини тыас улаханын, тардар күүһүн уонна частотатын быһаарар, мээрэйдиир. Саха сиригэр кырыымпа оҥорор маастар билигин элбэх, бары бэйэ бэйэбитин билсэбит, ыалдьыттаһан уопут атастаһабыт», — диэн кэпсиир маастар.
Кыттааччылар оҥоһуктарын хаартыскаларга көрүҥ.
Сообщение Талба талааннаахтар түһүлгэлэригэр норуот маастардара бастыҥ оҥоһуктарын көрдөрдүлэр появились сначала на Улус Медиа.