Быйыл Бүлүү улууһун Тааһаҕар нэһилиэгин 166 №-дээх быыбардыыр учаастага аан бастаан Н. Н. Каратаев аатынан Тааһаҕар орто оскуолатын дьиэтигэр куоластааһыны ыытта.
«Быыбар буолуон иннинэ, атырдьах ыйын 20 күнүттэн балаҕан ыйын 15 күнүгэр диэри, «ИнформУИК» бырайыак чэрчитинэн учаастактааҕы быыбардыыр хамыыһыйа икки чилиэнэ нэһилиэк ыалларын кэрийэн, Судаарыстыбаннай Дуума дьокутаатын талар быыбар туһунан дьоҥҥо-сэргэҕэ кэпсээбиттэрэ, быыбар күннэрин иһитиннэрбиттэрэ. Бу үлэ түмүгүнэн аҕам саастаах дьон быыбар буоларын билэллэрин-кэтэһэллэрин ордук биллэрбиттэрэ. Орто уонна эдэр саастаах сорох дьон быыбар хаһан, ханна буоларын туоһуласпыттара.
Быыбар маҥнайгы күнүттэн бүгүҥҥү күҥҥэ диэри куоластыы кэлэр дьоммут сахалыы киэргэнэн-симэнэн, таҥнан-симэнэн, үлэлиир кэлэктииптэринэн күргүөмүнэн кэлэн, быыбардыыр учаастагы сэргэхситэллэр. Биһиэхэ испииһэгинэн 313 быыбардааччы баарыттан 273 киһи бүгүн күн аҥаарыгар бэйэтин куолаһын биэрдэ. Быйыл аан бастаан куоластыыр эдэр ыччат элбэҕэ — ол кинилэр гражданскай позициялаахтарын көрдөрөр. Быыбар бара турар, үс күн устата бу күн төрөөбүт күннээх быыбардааччылар түбэстилэр», — диэн уһун сылларга быыбар хамыыһыйатын бэрэссэдээтэлинэн үлэлиир Наталья Семенова кэпсээтэ. Кини эппиэтинэстээхтик, сатабыллаахтык үлэлиир буолан, быыбар дьэҥкэтик, аһаҕастык уонна ситиһиилээхтик ааһар — ол кини улахан өҥөтө диэн учаастак чилиэннэрэ этэллэр. Ол да иһин быыбар түмүгүнэн Тааһаҕар нэһилиэгэ мэлдьи үрдүк көрдөрүүлээх куоластааһыннаах нэһилиэктэр ахсааннарыгар киирэр.
