710 №-дээх быыбардыыр учаастак Дьокуускай куорат киинигэр — 17-с оскуолаҕа үс күн устата үлэлээтэ.
Бу Дьокуускай куорат быыбардыыр учаастактарыттан биир бөдөҥнөрүнэн буолар.
Салайааччы Оксана Борисова бэлиэтииринэн, быыбар хамыыһыйатын 16 чилиэнэ бары кэриэтэ 20-тэн тахса сыл үлэлээбит уопуттаах дьон. Үгүстэрэ 17-с оскуола учууталлара эбит.
— Биһиги учаастакпыт быыбардааччылара олоххо биир саамай көхтөөх, инники күөҥҥэ сылдьар орто саастаах дьон. Быйылгы быыбарга олус элбэх саҥа быыбардааччы кэлбитэ биһигини олуһун үөртэ. Кэрэхсэбиллээҕэ баар, бары кэриэтэ 17-с оскуоланы бүтэрбит бэйэбит выпускниктарбыт, — диэн санаатын үллэһиннэ Оксана Ивановна. Кырдьык, миигин кытта кэпсэтэ олорон, быыбардыыр учаастак салайааччыта сотору-сотору тохтоон, эдэр быыбардааччыны эҕэрдэлээн, бэлэх туттарда. Онон бу бүгүгүҥҥү быыбарга ыччаттар хото кэлэн быыбардаабыттарын бэлиэтиэххэ сөп.
Оксана Борисова иһитиннэрбитинэн 710 №-дээх быыбардыыр учаастак олохтоохтук бэлэмнэммит. Ол курдук, быыбар хамыыһыйата бары Саха сирин гербэтэ ойуулаах биир көстүүм (единая форма) тиктэрбиттэр. Быыбар иккис күнүн сахалыы таҥнан, флешмоб үҥкүүнэн арыйбыттар. Бүгүн эдэр быыбардааччыларын сахалыы астаах, саламааттаах, алаадьылаах остуол тэрийэн көрүстүлэр. Онон 710 №-дээх быыбардыыр учаастак атын учаастактарга бэртээхэй холобуру көрдөрдө.