Дьокуускайдааҕы УГМС исписэлииһин дааннайынан, бүгүн Дьааҥы улууһун Сайдыы сэлиэннньэтигэр Бытантай өрүс уутун таһыма 1039 см тиийдэ. Манна кутталлаах таһым 978 см тэҥнэһэр. Кэнники чаас иһигэр уу таһыма кыратык — 1 см түспүтэ бэлиэтэннэ.
Сэлиэнньэҕэ ыксаллаах быһыы-майгы (ЧС) эрэсиимэ өссө да күүһүгэр сылдьар. Уу тахсыбытын түмүгэр 82 тиэргэн ууга барда, ол иһигэр 41 олорор дьиэ уонна ыскылаат бааллар. Уу тиэргэннэргэ өссө да турар. Быстах кэмҥэ олордор пуунҥа уопсайа 25 киһи баар, ол иһигэр 10-на оҕолор.
Бэҕэһээ, от ыйын 23 күнүгэр, быыһыыр үлэлэри ыытарга Саха Сиринээҕи Быыһыыр сулууспатын Дьааҥытааҕы көрдүүр-быыһыыр этэрээтин үлэһиттэрэ «Полярные авиалинии» авиакхампааньа бөртөлүөтэн Сайдыы сэлиэнньэтигэр тиэрдиллибиттэрэ. Бүгүн быыһааччылар улуус баһылыгын солбуйааччытын кытта ууга барбыт тиэргэннэри кэрийдилэр.
Дьааҥытааҕы көрдүүр-быыһыыр этэрээт салайааччыта Егор Слепцов сырдаппытынан, быыһааччылар ууга барбыт икки тиэргэни хомуйбуттар, олохтоохтор дьиэлэриттэн малларын-салларын таһаарарга уонна лаардартан астарын ыларга көмөлөспүттэр. Эмсэҕэлээбит дьоҥҥо гуманитарнай көмө түҥэтилиннэ. Быыһааччылар быһылаан тахсыбыт сиригэр үлэлэрин салгыыллар диэн Саха Сиринээҕи Быыһыыр сулууспата суруйар.