Бүгүн, от ыйын 6 күнүгэр, сарсыарда 8 чааска түмүллүбүт дааннайдарынан сирдэттэххэ, өрөспүүбүлүкэ 17 улууһугар уонна “Дьокуускай куорат” уокурук сиригэр-уотугар ойуур баһаарын кытта охсуһуу ураты эрэсиимэ биллэриллэн, уоту эргийии уонна умуруоруу үлэлэрэ ыытыллаллар. Ити иһиттэн Эдьигээҥҥэ, Нерюнгрига, Тааттаҕа улуус таһымынан ыксаллаах-быһыы майгы эрэсиимэ олохтонон турарын санатабыт.
Ааспыт субуота киэһэ Авиалесоохрана үлэһиттэрэ Нерюнгри оройуонугар 3 127 гектар иэннээх ойуурга тарҕаммыт бүтэһик улахан уоту саба туттулар. Бу уот бэс ыйын 24 күнүгэр кураанах этиҥтэн көрдүгэннээбитэ. Уоту умуруорууга Авиалесоохрана Чульманнааҕы, Дьокуускайдааҕы, Бэрдьигэстээхтээҕи, Покровскайдааҕы, Бүлүүтээҕи, Витимнээҕи уонна Саҥыйахтаахтааҕы (Өлүөхүмэ) салааларыттан 133 баһаарынньык-десантник үлэлээтэ. Барыта 9 анал тиэхиньикэ туһанылынна.
Ол оннугар бу күннэргэ Эдьигээҥҥэ үс сиргэ тэҥинэн уот туран тэнийэн, онно эбии тыалыран-силлиэрэн, быһыы-майгы уустугураары ыксатан, уоту умуруорар тэриллиилэр улахан аҥаардарын ити хотугу улууска быраҕарга күһэлиннилэр. Эдьигээн улууһун баһылыгын бастакы солбуйааччы Д.Г. Татаринов дьаһалынан бэҕэһээ киэһээҥҥиттэн ыксаллаах быһыы-майгы эрэсиимэ олохтонно.
Бу тыҥааһыннаах кэмҥэ экология, айылҕаны туһаныы уонна ойуур хаһаайыстыбатын миниистирин солбуйааччы Андрей Коноплев уонна Авиалесоохрана Дьокуускайдааҕы базатын начаалынньыга Владимир Леонов авиаотделениелар салайааччыларын кытта күн аайы ВКС эрэсииминэн мунньахтыыллар. Бүгүн сарсыардааҥы сүбэ мунньахха чуолкайдаммытынан, бу кэмҥэ 260,1 гектардаах ойууру хабар 12 уот баар, 321 киһи уонна 5 тиэхиньикэ үлэлииллэр.
Быйыл сезон саҕаланыаҕыттан ойуур пуондатын сиригэр 15 288,8 гектарга тэнийбит 156, ураты харыстанар сиргэ 7 гектарга 1 итиэннэ атын категорияҕа киирсэр сирдэргэ 1 000,9 гектар иэннээх айылҕа 24 уоттара бохсулуннулар.
Василий Никифоров
(Авиалесоохрана пресс-сулууспатын иһитиннэриилэригэр олоҕуран)
Сообщение Ойуур уота: Нерюнгри баһаара бохсулунна, Эдьигээҥҥэ сэтэрээтэ появились сначала на Улус Медиа.