Араас бириистэргэ, наҕараадаларга улахан ааттаах-суоллаах тэрилтэлэр харчынан өйөбүл оҥорбут буоллахтарына, Кэбээйиттэн төрүттээх дьон бэйэлэрин баҕаларынан эмиэ араас өйөбүлү оҥордулар.
Ол курдук, «Дыгын оонньууларын» кыайыылаахтарын чиэстээһиҥҥэ урбаанньыт Семен Дьяконов төрөөбүт Кэбээйилэрин дорҕоонноохтук ааттаппыт Артем Дьяконовка уонна Яков Дмитриевка бэйэтин аатыттан сүүстүү тыһыынча солкуобайдаах сэртипикээти бэлэх уунна. Мин Семены кытта анаан көрсөн кэпсэттим.
«Эн төрөөбүт дойдугар олох бэриниилээх киһи эбиккин. Бэйэҥ ханнык нэһилиэктэн төрүттээххиний?» — диэн ыйыппыппар, Семен Дьяконов маннык хоруйдаата:
— Бэйэлээхэй бэйэм дойдубар Кэбээйи сэлиэнньэтигэр Олоҥхо ыһыаҕа ыытылла турарыттан олуһун үөрэбин, киэн туттабын. Бу Уһун Хонууга буолбут улуустааҕы ыһыахха оччолорго оскуолаҕа үөрэнэ сылдьар Артем Дьяконов кыттыбыта. Онно кыттарыгар ситиһиилэнэн, «аны Дыгын оонньууларыгар бэлэмнэниэм уонна хайаан да кыайыылаах буолуом» диэбитин истибитим. «Дыгыҥҥа» киниэхэ «ыалдьан», хаһыыбыттан күөмэйим «бүппүтэ» билигин да ааһа илик. Оннук кини — Артем туһугар «ыалдьыбытым». Уолбут эппит тылын эрэллээхтик толордо. Ол иһин өйөбүл буоллун диэн Кэбээйи кэскиллээх уолаттарыгар Артем Дьяконовка уонна Яков Дмитриевка харчынан өйөбүл оҥордум.
Былырыын бэйэ дьыалатын тэринэн, өрөспүүбүлүкэ улуустарыгар дьоҕус дьиэлэри тутан саҕалаабытым. «Этэрбэс араадьыйатын» көмөтүнэн үлэм тахсыылаах. Аны ыраах айан суоппардарын кытта үлэлэһэн эрэбин. Онон толкуй, былаан үгүс, — диэн санаатын үллэһиннэ дойдутугар, төрөөбүт Кэбээйитигэр бэриниилээх эдэр киһи.
Семен Дьяконов курдук дойдуларыгар ис сүрэхтэриттэн кыһаллар ыччаттардаах буолан, Кэбээйи сиригэр Олоҥхо ыһыаҕа үрдүк таһымнаахтык ааста.