Саха сиригэр успуордунан уонна физкултууранан дьарыктанарга анаан 2309 успуорт эбийиэгэ, ол иһигэр 893 успуорт саалата, 54 сөтүөлүүр сир (бассейн), 636 аһаҕас спортивнай тутуулар, 22 хайыһар баазата, искусственнай муустаах алта сабыылаах спортивнай эбийиэк, 31 сыал ытар тутуу уонна 24 стадион аһыллыбыттар. Бу туһунан СӨ физическэй култууратын уонна успуордун министиэристибэтэ иһитиннэрэр.
—Спортивнай эбийиэктэри тутуу уонна саҥардыы, тэриллэри, экипировкалары оҥоруу уонна таһаарыы успуордунан тиһигин быспакка дьарыктанар дьон элбээһиниттэн хаалыа суохтаах. Билигин маннык дьоммут ахсаана 76 мөлүйүөн кэриҥэ. Бу гражданнар 57 бырыһыаннарын кэриэтэ буолар. Манна, этэргэ дылы, үүнэбит-сайдабыт, — диэн РФ Бэрэсидьиэнэ Владимир Путин бэлиэтээн турар.
СӨ успуордун министиэристибэтэ иһитиннэрбитинэн, 2025 сыллаахха эрэгийиэҥҥэ 9703 киһи, итинтэн 4438 дьахтар, уу успуордун көрүҥнэринэн дьарыктаммыт.
—Саха сирин оройуоннарыгар сөтүөлүүр сирдэр (бассейн) аһыллалларыттан үөрэбин. Дьокуускайга сөтүөлүүр сиргэ харбааһынынан тиһиктээхтик дьарыктанабын. Киин куорат бассейннарыгар барыларыгар спортсменнар эрчиллэллэрин сэргэ, доруобуйаҕа анаан харбааһынынан дьарыктаныахха эмиэ сөп, — диэн Дьокуускай олохтооҕо Марина Тимофеева санаатын үллэстэр.
Ил Дархан Айсен Николаев Саха сиригэр инфраструктура сайдыытыттан успуорка эмиэ үчүгэй өрүт көстөрүн бэлиэтиир.
-Хас үһүс киһи физкултууранан, успуордунан тиһиктээхтик дьарыктанар, спортивнай тэрээһиннэр элбэх киһи кыттыылаах ыытыллаллар. Успуордунан дьарыктанар сирдэргэ наадыйааччы улахан куораттарга эрэ буолбакка, тыа сиригэр эмиэ улаатар, — диэн Ил Дархан Айсен Николаев тоһоҕолоон бэлиэтиир.
Сиһилии: https://www.sakha.gov.ru/news/57748
СӨ Ил Дарханын уонна Бырабыыталыстыбатын пресс-сулууспата