РФ Бэрэсидьиэнэ Владимир Путин дьиэ кэргэн институтун бөҕөргөтүүгэ уонна оҕолору иитиигэ улахан өҥөтүн үрдүктүк сыаналаан Амма улууһун Эмис сэлиэнньэтин олохтооҕор Туйаара Петровна Устиноваҕа «Дьоруой ийэ» үрдүк ааты иҥэрдэ. СӨ Ил Дархана Айсен Николаев Туйаара Петровнаны үрдүк ааты ылбытынан истиҥник эҕэрдэлээтэ.
«Кэргэнин Сергей Анатольевиһы кытта уон оҕоҕо — биэс уолга, биэс кыыска күн сирин кэрэтин көрдөрбүттэр. Билигин Туйаара Петровна номнуо 13 сиэннээх. Кини эбэтэ Елена Петровна Новикова уонна ийэтэ Татьяна Никифоровна Новикова уон биирдии оҕону көрөн-истэн улаатыннарбыттар, иккиэн ССРС «Дьоруой ийэлэрэ» диэн үрдүк ааты ылбыттар. Биир ыалга үс көлүөнэ, үс Дьоруой ийэ, оҕолорун таптаан, эппиэтинэһи сүгэн, иитэн, көрөн-истэн улаатыннарыылара, чахчы олус үчүгэй история. Туйаара Петровна 30-тан тахса сыл оҕолору иитиигэ-үөрэтиигэ үлэлээбит, төрөөбүт бөһүөлэгэр элбэҕи оҥорор, ыалларга, эдэр ийэлэргэ көмөлөһөр. Кини оҕолоро номнуо улаатан үлэһит үтүөлэрэ, бэйэлэрин оҕолорун көрөллөр-истэллэр уонна дьиэ кэргэн үтүө үгэһин салгыыллар», — диэн Айсен Николаев МАХ мессенджеригэр суруйар.
Туйаара Петровна Саха сиригэр РФ «Дьоруой ийэ» үрдүк ааты иккиһинэн ылла. Өрөспүүбүлүкэҕэ аан бастаан бу үрдүк ааты Нерюнгри оройуонун Иенгра сэлиэнньэтин олохтооҕо Татьяна Владимировна Юдинцева ылбыта. Уон түөрт оҕолоох ийэҕэ үрдүк аат РФ Бэрэсидьиэнин ыйааҕынан 2023 сыллаахха иҥэриллибитэ.
Туйаара Петровна 30-тан тахса сыл «Чуораанчык» оскуола иннинээҕи үөрэх тэрилтэтигэр үлэлээбитэ. Бүгүн кини Эмис сэлиэнньэтин дьахталларын сэбиэтин бэрэссэдээтэлэ, нэһилиэк Сэбиэтин дьокутаата, Эмис оскуолатыгар төрөппүт кэмитиэтин салайааччыта уонна «Көлүкэчээн» дьахталлар ансаамбылларын салайааччыта. Кини салалтатынан дьахталлар сэбиэттэрэ элбэх оҕолоох ыалларга, эдэр ийэлэргэ, байыаннай дьайыы кыттыылаахтарыгар уонна кинилэр дьиэ кэргэттэригэр көмөлөһөллөр, нэһилиэги тупсарыыга, маһы, талаҕы, күөх үүнээйини олордууга улахан үлэни ыыталлар.
Дьиэ кэргэн аҕа баһылыга Сергей Анатольевич Устинов «Биэс уол» диэн бааһынай (фермерскэй) хаһаайыстыба салайааччыта, Эмис нэһилиэгин эр дьонун Сэбиэтин бэрэссэдээтэлэ, Аҕа күрэҕэ» өрөспүүбүлүкэтээҕи аҕалар уонна уолаттар күрэхтэһиилэрин хас да төгүллээх чөмпүйүөнэ этэ.
Устиновтар дьиэ кэргэн оҕолоро бары үөрэххэ, успуорка уонна уопсастыбаннай үлэҕэ ситиһиилээхтэр. Улахан уол Александр дьиэ кэргэн тирэҕэ, сапыраапка ыстаансыйатыгар операторынан үлэлиир, түөрт оҕолоох. Кыыстара Эльза Эмис учаастактааҕы балыыһатын медсиэстэрэтэ, иккитэ «Балыыһа бастыҥ үлэһитэ» ааты ылбыта. Уоллара Герман көҥүл тустууга Арассыыйаҕа норуоттар икки ардыларынааҕы кылаастаах успуорт маастара. Кыыстара Айза остуол тенниһигэр Амматааҕы ДЮСШ тириэньэрэ. Кыыстара София ХИФУ психология факультетын выпускницата, психологынан үлэлиир. Кыыстара Туйаара оҕо саадын иитээччитэ, өрөспүүбүлүкэтээҕи уонна норуоттар икки ардыларынааҕы куонкурустар лауреаттарын бэлэмниир. Уоллара Прохор РФ Сэбилэниилээх күүстэригэр сулууспалыыр. Кыралара — Игнатий, Сергей уонна Татьяна — оскуолаҕа туйгуннук үөрэнэллэр, өрөспүүбүлүкэтээҕи күрэхтэһиилэргэ, НПК, олимпиада, тустуу призердара.
Туйаара Петровнаҕа «Дьоруой ийэ» үрдүк ааты иҥэрии кини өр сыллаах эҥкилэ суох үлэтин, дьиэ кэргэҥҥэ бэриниилээҕин уонна СӨ, РФ демографическай политикатын сайыннарыыга кылаатын билинии, үрдүктүк сыаналааһын буолар.
СӨ Ил Дарханын уонна Бырабыыталыстыбатын пресс-сулууспата
Хаартыска: СӨ үлэҕэ уонна социальнай сайдыыга министиэристибэтин тиксэриитэ
Сиһилии: https://www.sakha.gov.ru/news/63916