Кулун тутар 25 күнүгэр Хаҥалас улууһун Покровскай куоратыгар буолбут Литература кулууптарын уонна айар түмсүүлэрин II өрөспүбүүлүкэтээҕи форумнарын кэмигэр биллэриллибит «“Чолбон” айар кыһата» бырайыак «Туймаада ыһыаҕын кэпсээннэрэ» диэн саҥа түһүмэҕин сүүмэрдиир олуга түмүктэннэ. «Чолбон» сурунаал эрэдээксийэтэ бу күрэһи «Үс Хатыҥ» архитектура-этнография комплексын кытта «Сахабэчээт» СӨ САТ, «ЯрСтрой» бырайыактыыр-тутар тэрилтэ, П.А. Ойуунускай аатынан литература судаарыстыбаннай музейын өйөбүллэринэн ыытта.
Кыттааччылар көрдөһүүлэринэн күрэскэ кэпсээннэри тутуу муус устар 20 күнүттэн 26-ска диэри уһатыллыбыта. Үөһээ Бүлүүттэн, Кэбээйиттэн, Тааттаттан, Амматтан, Чурапчыттан, Намтан, Хаҥаластан уонна Дьокуускайтан барыта 19 үлэ киирдэ. Ол иһигэр үс суруйааччы сойууһун чилиэнэ кыттыбыт. Кэпсээни сэргэ эссе, уочарка, ахтыы жанрдаах үлэлэр бааллар. Дьүүллүүр сүбэ муус устар 29 күнүгэр түмүгү таһаарда. Манна В.К. Арсеньев аатынан «Илин Уһук» бириэмийэ лауреата прозаик Анатолий Слепцов, СӨ үтүөлээх суруналыыһа, прозаик, тылбаасчыт Данил Макеев уонна «Чолбон» сурунаал бас эрэдээктэрэ Гаврил Андросов үлэлээтилэр. Эсперт быһыытынан саха норуотун суруйааччылара Николай Лугинов уонна Елена Слепцова-Куорсуннаах, «Саха сирин суруйааччыта» ассоциация бэрэссэдээтэлэ Олег Сидоров, литература кириитигэ Ольга Макарова уонна филология наукатын кандитата Мария Кириллина кыттыстылар.
«“Чолбон” айар кыһата» бырайыак «Туймаада ыһыаҕын кэпсээннэрэ» түһүмэҕин биэс бастыҥ кэпсээнин ааптардарынан Мария Винокурова-Мааны Маарыйа (Дьокуускай), Светлана Егорова (М.К. Аммосов аатынан Хотугулуу-Илиҥҥи федеральнай университет), Ульяна Захарова (Дьокуускай), Сардаана Корякина-Сардаана (Дьокуускай), Федор Павлов (Таатта) буоллулар. Бырайыак күрэс эрэ буолбакка, кыттааччы айар үөрүйэҕин чочуйарын быһыытынан дьүүллүүр сүбэ бу биэс кыттааччыга кэпсээннэри чочуйууга мэктиэ оҥорон ыытта. Кинилэр айымньылара сурунаал бэс ыйынааҕы нүөмэригэр бэчээттэниэхтэрэ уонна https://cholbon.online/ сайтка тахсыахтара.
Ону сэргэ Туймаада ыһыаҕын иннинэ ааҕааччылар «Чолбон» сурунаал сайтын нөҥүө куоластаан бу биэс кэпсээнтэн биһирээбит айымньыларын талыахтара. Итиэннэ биэс эксперт талбыт бастыҥ ааптарын аата биллиэ. Кыайыылаахтары бэлиэтээһин үөрүүлээх түгэнэ от ыйын 1 күнүгэр – Саха төрүт бэчээтин күнүгэр буолуоҕа. Кинилэр спонсорбыт «ЯрСтрой» бырайыактыыр-тутар тэрилтэттэн уонна «Үс Хатыҥ» архитектура-этнография комплексын партнердарыттан сыаналаах бириистэринэн наҕараадаланыахтара.
«Үс Хатыҥ» архитектура-этнография комплексын салайааччыта Юрий Яроев кыайыылаахтары эҕэрдэлээн туран:
– Туймаадаҕа ыһыаҕа аан дойду киэҥник биллэн эрэр, Гиннес рекордугар киирбитэ. Омуктар кэрэхсээн үгүс ыалдьыт сылдьар буолла. Бу саха төрүт культуратын сайыннарар бырайыак саха искусствотын нөҥүө үйэтийиэхтээх. «Чолбон» сурунаал эрэдээксийэтин кытта ыытыллыбыт күрэс онуоха бастакы хардыы буолар. Биһиги, Туймаада ыһыаҕын тэрийээччилэр, «Үс Хатыҥ» архитектура-этнография комплекса маннык бырайыактары кэрэхсиибит уонна бииргэ үлэлэһэбит, – диэн санаатын үллэһиннэ.
«Чолбон» сурунаал эрэдээксийэтэ
Сообщение «“Чолбон” айар кыһата» бырайыак «Туймаада ыһыаҕын кэпсээннэрэ» түһүмэҕин биэс бастыҥа билиннэ появились сначала на Улус Медиа.