Өлүөнэ тардыытынааҕы уу салалтатыттан иһитиннэрэллэринэн, Өлүөнэ көмүөлүн аллараа кирбиитэ Саха сиригэр ыам ыйын 10 күнэ буолар түүнүгэр киирбитэ. Элбэх сыллааҕы орто болдьохтон 2 суукка хойутаан, ити күн сарсыарда 4 чааска Витим бөһүөлэк аннынан өрүс эстибитэ. Сарсыарда 8 чааска харыы тахса сылдьыбыта. Онтон күнүс төлөрүйэн, салгыы устубута.
Бүгүн сарсыарда ити учаастакка уу таһыма кутталлаах бэлиэттэн 2,9-4 м аллара сылдьар. Ааспыт суукка иһигэр уу 3,6-4,7 м түстэ. Муус сэдэхтик устар.
Пеледуй бөһүөлэктэн аллара харан турбут муус халҕаһаны алдьатыы түмүгэр көмүөл түргэнник хамнаан, ыам ыйын 11 күнүн киэһэтигэр Ленскэй куорат аннынан эбэ нуорматтан биир хонук эрдэлээн эһиннэ. Маҥнай хамныырыгар уу таһыма нуорматтан 0,2 м үрдүк этэ. Бүгүн сарсыарда уу таһыма 876 см этэ. Муус хойуутук ааһар.
Нүүйэ сэлиэнньэтин аннынан муус бүгүн сарсыарда уһунна. Онон эмиэ нуорматтан биир суукка урутаата. Бастаан эстэрин саҕана уу таһыма нуорматтан 0,5 м үрдүгэ. Уу кэлиҥҥи сууккаҕа 3,6 м эбиллэн, 779 см тиийдэ. Көмүөл хойуутук устар.
Бу кэмҥэ көмүөл 1-кы учаастагын аллараа кырыыта Маача сэлиэнньэтиттэн аллара (өрүс төрдүттэн 2 313 км тэйиччи) бэлиэтэнэр. “Дэлгэй – Өлүөхүмэ” учаастак аллараа сүүрүгэр муус хамсаата. Көмүөл 2-с учаастагын аллараа кырыыта, Өлүөхүмэ үрэх уутун киллэрэн, Өлүөхүмэ Хоротуттан аллара (өрүс төрдүттэн – 2 033 км) көстөр.
Хаҥалас улууһугар “Иһит – Покровскай” учаастакка эбэ ырбыылаата уонна уу суукка иһигэр 0,1-0,6 м эбилиннэ.
Гидрометеорологтар сабаҕалыылларынан, улахан өрүс көмүөлэ Өлүөхүмэ куорат аннынан сарсын, ыам ыйын 13 күнүгэр, саҕаланыа. Онтон “Покровскай – Дьокуускай” учаастакка ый 16-17 күннэригэр хамныа диэн күүтэллэр. Санаттахха, Өлүөнэ өрүс Дьокуускай куорат аннынан эстэр орто болдьоҕо – ыам ыйын 18 күнэ.
Василий Никифоров
Сообщение Сааскы халаан: Өлүөнэ көмүөлэ сарсын Өлүөхүмэ куорат анныгар кэлиэ появились сначала на Улус Медиа.