Кэбээйи нэһилиэгэр XIX Өрөспүүбүлүкэтээҕи Олоҥхо ыһыаҕар бэлэмнэнии, Арассыыйаҕа Сомоҕолоһуу, СӨ култуура сылларын чэрчитинэн Кэбээйи улууһун олохтооҕо, Норуот маастара, тимир ууһа Владимир Яковлев сырдык кэриэһигэр аналлаах тимири уһаарыы «Сөргүтүү» семинар-практикум үөрүүлээх арыллыытын сиэрэ-туома ыытылынна. Бу туһунан «Дабаан» хаһыат суруйар.
Тэрээһиҥҥэ өрөспүүбүлүкэ араас улуустарыттан биллэр уустар тоҕуруһа түмүстүлэр.
Уус түһүлгэтин арыйыы сиэрин-туомун СӨ норуотун маастара, СӨ култууратын туйгуна, Аан дойдутааҕы Хомус 7-с конгреһын кыттыылааҕа, Аан дойдутааҕы хомус күрэҕин кыайыылааҕа, республикаҕа, улууска ыытыллар уус-уран оҥоһуктар быытапкаларын кыайыылааҕа Артем Киренскай арыйда. Эҕэрдэ тыллары Кэбээйи улууһун култууратын салайааччыта Илья Алексеев, Кэбээйи нэһилиэгин баһылыга Илья Левин, Сангаар бөһүөлэгин баһылыга Николай Попов тириэртилэр.
Тэрээһиҥҥэ Владимир Иннокентьевич Яковлев кэргэнэ Айталина Ивановна, бииргэ төрөөбүт балта Мария Иннокентьевна Яковлевалар олус долгуйан туран күндү киһилэрин туһунан ахтыыны оҥордулар.
Үс күннээх тэрээһин кэмигэр уустар үс өрүс силбэһэр сиригэр-уотугар Өлүөнэ, Бүлүү уонна Алдан өрүстэриттэн аҕалыллыбыт болгуо тимирдэртэн Сомоҕолоһуу тааһын чочуйан таһаарыахтара. Маны сэргэ улуус, нэһилиэк олохтоохторугар анаан маастар-кылаастары ыытыахтара, лекциялары ааҕыахтара.
Светлана Оконешникова
Сообщение Олоҥхо Ыһыаҕын көрсө: Кэбээйигэ тимири уһаарыы ньымаларын кэпсэтиэхтэрэ появились сначала на Улус Медиа.