«Илии сылааһа-2026» өрөспүүбүлүкэтээҕи VI куонкурус ыам ыйын 28 күнүттэн бэс ыйын 8 күнүгэр диэри ыытыллыаҕа. Өрөспүүбүлүкэ дьахталлара байыаннай дьайыы кыттыылаахтарыгар байыаннай таҥас кэмпилиэгин тигиигэ күрэхтэһиэхтэрэ.
Куонкурус сүрүн соруга — байыастары өйөөһүн уонна волонтердар хамсааһыннарын сайыннарыы. Куонкуруска муниципалитеттартан уонна куорат уокуруктарыттан хомуллубут иистэнньэҥнэр хамаандалара кэтэхтэн көрүҥүнэн кыттыахтара.
Кыттааччылар 14 биридимиэттэн турар «Эр хоһуун» диэн сайыҥҥы кэмпилиэги уонна эбии таҥаһы-сабы тигиэхтэрэ. Хамаандаҕа 10 толору кэмпилиэккэ анаммыт таҥас уонна фурнитура бэриллэр.
«Саамай сатабыллаах кырыйааччы» туспа быһаарыллыаҕа. Кыайыылаах матырыйаалы хайдах туһаммытынан, кырыйыыта чуолкайынан уонна таҥас кээмэйин төһө тутуспутунан быһаарыллыаҕа.
Куонкурус түмүктэрин үөрүүлээх быһыыга-майгыга биллэриэхтэрэ. Иистэнньэҥнэр илиилэрин сылааһын уонна кыһамньыларын ууран туран тикпит таҥастарын байыастарга ыытыахтара.
СӨ Ил Дарханын уонна бырабыыталыстыбатын пресс-сулууспата